काठमाडौँ । सरकारले पेट्रोलियम पदार्थको मूल्य घटाएको छ । नेपाल आयल निगम व्यवस्थापनको निर्णयअनुसार सबै प्रकारको पेट्रोलियम पदार्थको मूल्य समायोजन भएको हो ।

निगमका अनुसार पेट्रोल, डिजेल र मट्टितेलमा प्रतिलिटर ३ रुपैयाँका दरले मूल्य घटाइएको छ । योसँगै अब पेट्रोल प्रतिलिटर १७५ रुपैयाँ, डिजेल र मट्टितेलको प्रतिलिटर १७२ रुपैयाँ कायम भएको छ ।

यसअघि निगमले घाटा रहेको र अन्तर्राष्ट्रिय बजारमा मूल्य घटबढ भइरहेको भन्दै मूल्य समायोजन गर्न अस्वीकार गरेको थियो ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री भएसँगै पेट्रोलियम पदार्थको मूल्य समायोजन गर्न निर्देशन दिएका थिए ।