काठमाडौँ । जनकपुर धामका दुई युवाको भारतमा अपहरणपछि हत्या भएको भन्दै परिवारले जिल्ला प्रहरी कार्यालय धनुषामा विरोध गरेका छन् ।

मृतकका आफन्त र स्थानीयहरूले आफूले मृत्यु हुनभन्दा पहिला प्रहरीलाई खबर गरे पनि प्रहरी प्रशासनले आवश्यक चासो नदिएको भन्दै विरोध जनाएका हुन् । १४ दिन अगाडिदेखि सम्पर्कविहीन भएका जनकपुरधाम उपमहानगर ८ का २१ वर्षका रोहित साह र वडा नं. १३ निवासी वर्ष २२ का विष्णु साहको अपहरणपछि भारतमा हत्या भएको थियो ।

रोहित विष्णुलाई लिएर भारतको सीतामढी जिल्लाको बेला परिहार बस्ने आफ्नो नातेदारको घर गएका बेलामा अपहरणकारीले अपहरण गरी परिवारसँग फिरौतीको माग गरेका थिए । तर, परिवारले फिरौतीको रकम बढाउँदै गएपछि प्रहरीलाई खबर गरेका थिए ।

भारतीय सीमा गाउँमा उनीहरू दुवैको हत्या भएको थियो । गत सोमबारसम्म विष्णुका परिवारलाई फिरौतीको मागसहित भारतीय नम्बरबाट फोन आइरहेको र शुरुमा २० लाख मागेको जनाएको छ ।

विष्णुको परिवारले अपहरणकारीलाई २० लाख दिन राजी भएपछि परिवारले प्रहरीलाई जानकारी गराएको थियो । मंगलबारदेखि अपहरणकारीको मोबाइलमा सम्पर्क हुन छाडेपछि आफन्तले प्रहरीमा खबर गरेका थिए ।

मृतकका मामाले प्रहरीलाई पहिला नै हराएको र अपहरणमा परेको रिपोर्ट दिए पनि प्रहरीले चासो नदिएको आरोप लगाएका छन् । उनले जिल्ला प्रहरी कार्यालय धनुषाको लापरबाहीका कारण आफन्तले ज्यान गुमाउनु परेको बताउँदै आएका छन् ।

उनले प्रहरीले पीडित पक्षले कुनै रिपोर्ट नगरेकाले खोज्न गाह्रो भयो भनेर झुटो कुरा गरिरहेको बताए । उनले अपहरणकारीले पठाएको रेकर्ड अडियो हरेक पटक प्रहरीलाई दिएको दाबी गरे ।