काठमाडौं । नेपाल राष्ट्र बैंकका गभर्नर महाप्रसाद अधिकारीले नेपाल राष्ट्र बैंक पुँजीबजारप्रति नकारात्मक नरहेको बताएका छन् ।

आइतबार नेपाल आर्थिक पत्रकार समाज (सेजन) अवार्ड कार्यक्रममा बोल्दै गभर्नर अधिकारीले नेपाल राष्ट्र बैंक पुँजीबजारको विकास गर्न प्रतिबद्ध रहेको भन्दै कहिल्यै पुँजीबजारप्रति नकारात्मक नभएको बताए ।

‘पुँजी बजारप्रति राष्ट्र बैंक नकारात्मक हुनुपर्ने अवस्था छैन । पुँजी बजार हेर्ने छुट्टै केन्द्रिकृत नियमन निकायहरु रहेका छन् । धितोपत्र बोर्डले पुँजी बजारलाई नियन्त्रण र अनुगमन गर्छ । राष्ट्र बैंकले नियमन गर्ने भनेको वित्तीय क्षेत्रभित्रका बैंक तथा वित्तीय संस्थाहरुलाई हो । नेपाली पुँजी बजारमा बाफियाभित्र ७० प्रतिशत संस्थाहरु समावेश भएको कारणले राष्ट्र बैंकले यी संस्थाहरुलाई गरेको रेगुलेसनको कारण कुनै न कुनै विषयले प्रभाव परेको होला । राष्ट्र बैंकको नियत पुँजी बजारलाई असर परोस् भन्ने हुँदैन । हामीले जहिले पनि प्रोस्पर होस् भन्ने चाहन्छौं । राष्ट्र बैंक बैंकहरुसँग भएको पुँजी उत्पादनमुलक क्षेत्रमा लगानी होस् भन्ने हो । प्रत्यक्ष रुपमा शेयर बजारको विषयमा बोलेका हुँदैनौं ।’ गर्भनर अधिकारीले बताए ।

गभर्नर अधिकारीले शेयर बजार बढ्नु र कहिलेकाहीँ घट्नु स्वभाविक भएको भन्दै धितोपत्र बोर्डले पुँजी बजारलाई नियन्त्रण र अनुगमन गर्ने बताए ।