काठमाडौं । आईसीसी क्रिकेट विश्वकप लिग टु अन्तर्गत यूएईविरुद्ध पहिले ब्याटिङ गरेको नेपालले तेस्रो विकेट गुमाएको छ । एघारौ ओभरको दोस्रो बलमा क्याप्टेन रोहित पौडेल आउट भएका छन् । उनी ५ बल खेलेर १ रन बनाएर आउट भएका हुन् ।

नेपालले १३ ओभर सकिँदासम्म ५० रन बनाएको छ ।

आठौँ ओभरको अन्तिम बलमा ज्ञानेन्द्र मल्ल आउट भएका छन् । दोस्रो विके६ जाने बेलासम्म नेपालले ३४ रन बनाएको छ । मल्लले २६ बल खेलेर ११ रन बनाए । यसअघि चौँथो ओभरको दोस्रो बलमा ओपनर आरिफ शेख आउट भएका छन् ।

उनी १४ बलमा ६ रन बनाएर आउट भएका हुन् । नेपालले विकेट गुम्ने बेलासम्म १४ रन बनाएको छ ।

युएईका लागि दुवै विकेट जानियद सिद्दिकीले लिएका छन् ।

यूएईमा जारी शृङ्खलाको अन्तिम खेलमा नेपालले टस जितेर पहिले ब्याटिङ गर्ने निर्णय गरेको हो ।

खेल दुबई इन्टरनेशनल स्टेडियममा पौने १२ बजेबाट सुरु खेलमा एक जना सदस्य परिवर्तन गरिएको छ । घाइते हुँदै टिम बाहिर रहेका ओपनर कुशल भुर्तेलको स्थानमा युवा फास्ट बलर प्रतिश जिसीलाई ल्याइएको छ ।

प्रतिशले शृङ्खलाको पहिलो खेलमा पुवा न्युगिनीविरुद्ध खेल्दै ओडीआईमा डेब्यु गरेका थिए ।

लिग टुको शीर्ष तीनमा नेपाल र यूएई दुवैलाई आजको खेल महत्वपूर्ण छ । नेपालले शीर्ष तीनमा रहेर विश्वकप छनोटमा स्थान बनाउने सम्भावना कायम राख्न आजको खेल जित्नैपर्नेछ ।

यदि आजको खेलमा पराजित भए नेपाल शीर्ष तीनमा पुग्ने छैन ।