काठमाडौं । आईसीसी क्रिकेट विश्वकप लिग टू अन्तर्गत अन्तिम त्रिकोणात्मक शृंखलाको पहिलो खेल सुरु भएको छ । पहिलो खेलमा नेपाल र पपुवा न्युगिनी (पीएनजी)बीच टियू मैदान कीर्तिपुरमा खेल सुरु भएको हो ।

टस हारेपछि नेपालले पिएनजीविरुद्ध पहिला ब्याटिङ गरिरहेको छ ।

यसअघि यूएई शृङ्खलामा चोटका कारण सबै खेल खेल्न नपाएका कुशल भुर्तेल आज प्लेइङ सेटमा छन् । यूएईबाटै ओडीआईमा डेब्यु गरेका प्रतिश जिसीलाई बेञ्चमा राखिएको छ । युएईमा भएका दुई खेलमा नेपालले पिएनजीलाई पराजित गरेको थियो ।

यसअघि टियू मैदानमा शृङ्खला क्लिन स्वीप गरेको नेपाली टोली यसपटक पनि दोहोर्‍याउन चाहन्छ । यो शृङ्खलाका चार खेल जिते नेपालले शीर्ष तीनमा रहेर वर्डकप क्वालिफायर खेल्न पाउने छ । शृङ्खलामा नेपालले पीएनजी र यूएईसँग दुई–दुई खेल खेल्नेछ ।

रोहित पौडेलको कप्तानीमा रहेको नेपालको प्लेइङ ११मा आसिफ शेख, कुशल भुर्तेल, ज्ञानेन्द्र मल्ल, भीम शार्की, कुशल मल्ल, दीपेन्द्र सिंह ऐरी, आरिफ शेख, सोमपाल कामी, करण केसी र सन्दीप लामिछाने छन् ।