काठमाडौँ । नेपाल एकदिवसीय अन्तर्राष्ट्रिय वरीयतामा १६ औं स्थानमा उक्लिएको छ । राष्ट्रिय क्रिकेट टोली आइसिसी क्रिकेट विश्वकप लिग–२ को पछिल्लो समय उत्कृष्ट प्रदर्शन गरेपछि १९ औं स्थानबाट १६ औँ स्थानमा उक्लिएको हो ।

अन्तर्राष्ट्रिय क्रिकेट परिषद् (आइसिसी) ले मंगलबार अपडेट गरेको एकदिवसीयतर्फको वरीयतामा नेपालले नामिबिया, यूएई, अमेरिका र पपुवान्युगिनीलाई पछि पार्दै १६ औं स्थानमा उक्लिएको हो ।

नेपालले पछिल्ला ११ खेलमा १० जित निकाल्दै तीन स्थान सुधार गरेको हो।

नेपालभन्दा पछि रहेको नामिबिया १७ औं, अमेरिका १८औं, यूएई १९औं र पपुवा न्युगिनी २०औं स्थानमा छन्।

नयाँ एकदिवसीय वरीयतामा भारत शीर्ष स्थानमा छ । अस्ट्रेलिया दोस्रो स्थानमा छ। एसोसिएट राष्ट्रतर्फ स्कटल्याण्ड सबैभन्दा माथि १२औं स्थानमा छ।