काठमाडाैं । अभिनेत्री प्रियंका चोपडाले बलिउड छोड्ने निर्णयबारे मौनता तोडेकी छन्। हालै ड्याक्स शेफर्डको पोडकास्ट शोमा प्रियंकाले करियरको चरम बिन्दुमा पुगेपछी बलिउड उद्योग छोडेर गायन तर्फ लागेको बताइन् । बलिउडमा आफूले चाहेको काम नपाएको र त्यहाकाे राजनीतिबाट आफु निराश भएको उनले बताइन् ।

अभिनेत्री प्रियंकाले ‘म्युजिक लेबल देसी हिट्स’की अञ्जली आचार्यले अमेरिकामा संगीत करियर बनाउनका लागि अफर गरेको बताइन् । बलिउडबाट भाग्ने बाटो खाजिरहेकी उनले यो अफरलाई तुरुन्तै स्वीकारिन् ।

प्रियंकाले भनिन्– ‘मलाई वलिउडको एक कुनामा धकेलिएको थियो। कसैले मलाई कास्ट गरिरहेकाका थिएनन्। म वलिउडको राजनीतिबाट थाकिसकेकी थिएँ।’

अमेरिका गएर सांगीतिक क्षेत्रमा काम गर्ने मौका पाएकी प्रियंकाले संगीतकै कारण विश्वका विभिन्न ठाउँ घुम्ने मौका पाइन् ।

उनले सन् २०१२ मा संगीत करियर सुरु गरिन्। प्रियंकाको पहिलो गीत ‘इन माई सिटी’ थियो, यसबाहेक उनले ‘एक्सोटिक’, ‘आइ कान्ट मेक यु लभ मी’ जस्ता गीत गाएकी थिइन् । उनले सन् २०१५ मा रिलिज भएको फिल्म ‘मेरी कोम’मा आफ्नो पहिलो बलिउड गीत गाइन् ।

तर, संगीत क्षेत्रमा उनको करियरले गति लिन सकेन । यसै क्रममा प्रियंकाले आफ्नो अभिनय राम्रो भएको महसुस गरिन् । अन्य कयौंले पनि उनलाई अभिनयमा लाग्न सुझाव दिए ।

उनले करिब ५३ बलिउड फिल्ममा काम गरिसकेकी छिन्। जसमा बर्फी, बाजीराव-मस्तानी, दोस्ताना, क्रिस र डन २ जस्ता फिल्महरू पर्छन्। उनको अन्तिम बलिउड फिल्म २०१९ मा ‘द स्काई इज पिंक थियो, जसले बक्स अफिसमा राम्रो व्यापार गर्न सकेन। तर, २०१५ देखि प्रियंका बलिउडमा खासै सक्रिय छैनन् । उनी अहिले हलिउड फिल्म र अन्तर्राष्ट्रिय शोहरूमा आफ्नो छाप छोडिरहेकी छन्।

प्रियंकाले सन् २०१५ मा क्वान्टिको शोबाट हलिउडमा डेब्यु गरेकी थिइन् ।