काठमाडौँ । नेपाल उद्योग वाणिज्य महासंघका अध्यक्ष चन्द्रप्रसाद ढकालले बैंकिङ प्रणालीमा दुई खर्ब तरलता भए पनि बैंकको ब्याजदर उच्च भएकाले कर्जा प्रवाह हुन नसकेको बताएका छन् ।

शनिबार बाह्रखरी मिडियाले आयोजना गरेको आर्थिक परिसंवाद कार्यक्रममा बोल्दै अध्यक्ष ढकालले सरकार र राष्ट्र बैंकले नीतिगत निर्णय गरी बैंकको ब्याजदर घटाएर कर्जा प्रवाहको वातावरण बनाउन आवश्यक रहेको बताए ।

उनले स्थानीय तहमा गएको रकम ऋण पत्रलाई सिडी रेसियोमा गणना गर्न पाउने समय अवधि नभए बैंकमा रहेको दुई खर्बको तरलता ५० अर्बमा झर्न सक्ने दाबी गरे ।

उनले स्थानीय तहको ऋणपत्र बैंकको सिडी रेसियोमा गणना गर्न असार मसान्तबाट गर्न नपाउने भन्ने डरले बैंकहरूले कर्जा प्रवाह गर्न नसकेको बताए ।

उनले बैंकहरूले कर्जा प्रवाह गर्नका लागि राष्ट्र बैंकको सिडी रेसियो कायम गर्ने समय थप गर्ने सुनिश्चिता गर्नु पर्ने बताए ।

बैंकको खराब कर्जाको अनुपात ३ देखि ४ प्रतिशत पुगेको बताउँदै उनले सरकारले बजारमा तरलता सहज बनाउनका लागि तत्काल पुँजीगत खर्च बढाउन सरकारसँग माग गरे ।