काठमाडौँ । नेपाली क्रिकेट टोलीले यूएईलाई पराजित गर्दै एसीसी कपमा छनौट भएको छ । कीर्तिपुरस्थित त्रिवि क्रिकेट मैदानमा दुई दिन चलेको फाइन खेल नेपालले जितेको हो ।

वर्षाका कारण सोमबार रोकिएको फाइनल खेल आज पूरा भयो । यूएईले नेपाललाई ११८ रनको लक्ष्य दियो ।

सामान्य लक्ष्य पाएको नेपालले खराब सुरूआत गर्दै आठौँ ओभरसम्म तीन विकेट गुमाउन पुग्यो । यतिबेलासम्म नेपालको खातामा जम्मा २२ रन बनेको थियो ।

ओपनर कुशल भुर्तेल १.२ ओभरमै आउट भएपछि गुल्सन झा क्रिजमा आए । उनै गुल्सनले नेपालाई जित दिलाए ।

गुल्सनलाई राम्रो साथ दिएका दिए, भीम सार्कीले । उनीहरू सम्हालिए । यो जोडीले नै नेपाललाई उपाधि दिलाए । एसीसी कपमा छनौट हुने अपेक्षासहित आएको यूएई पराजित भयो ।

खेलको १८ औँ ओभरमा गुल्सनले एक छक्का र दुई चौका हानेर नेपालको अवस्था बलियो बनाए । ३० औँ ओभरसम्म गुल्सनले अर्धशतक बनाए । ३१.३ ओभरमा गुल्सनले एक रन लिदै नेपाललाई उपाधि दिलाए ।

नेपालको जितका लागि गुल्सनले ६ छक्कासहित तीन चौका प्रहार गरे । खेलमा उनले अविजित ६७ रन बनाए । गुल्सनकै उत्कृष्ट प्रदर्शनमा नेपालले इतिहास बनाउन पुग्यो । उनलाई साथ दिएका भीमले चार चौको मद्दतमा अविजित ३६ रन बनाए ।

एसीसी कपमा छनौट हुने यूएईको सपना गुल्सनले चकनाचुर बनाए । र, आफ्नै देशको ऐतिहासिक सपना पूरा गरे ।

यसअघि गुल्सनले यूएईको आइसीसी विश्वकपमा छनौट हुने सपना हत्याएका थिए । त्यस खेलमा पनि उनले सानदार प्रदर्शन गर्दै नेपाल र नेपालीको सपना पूरा गरे ।

गत चैत २ गते भएको आइसीसी विश्वकप लिग २ मा यूएईले नेपाललाई विशाल रनको लक्ष्य दिएको थियो । यूएईले दिएको कीर्तिमानी ३११ रनको लक्ष्य नेपालका लागि कठिन थियो ।

खेलमा ४१ ओभर पूरा हुँदा नेपालले ६ विकेट गुमाएर २३५ रन मात्रै बनाउन सकेको थियो । ब्याटिङमा गुल्सन नै थिए । २५ रन बनाएका उनलाई दिपेन्द्रसिंह ऐरीले ४ रन बनाएर साथ दिइरहेका थिए ।

टोली कठिन अवस्थामा हुँदै गर्दा ४२ औँ ओभरमा गुल्सनले २० रन जोडे । महम्मद वसिमको बलमा उनले तीन चौका र एक छक्का प्रहार गरे । यसपछि खेल नेपालको पक्षमा हुन पुग्यो ।

थप २ ओभर खेलेपछि अम्पायरले खेल रोके । जतिबेला नेपालको स्कोर ४४ ओभरमा २६९/६ स्थिति थियो । र, डिएल मेडथका आधारमा नेपाल ९ रनले विजयी भयो । योसँगै नेपाल विश्वकप छनौट भयो । उता यूएईको एक ठूलो सपना क्षणभरमा अन्योलमा पुग्यो ।

जिम्बाब्बेमा हुने वर्ल्ककप क्वालिफायरमा आईसीसी सुपर लिगका पुछारका पाँच टोली, आइसीसी लिग २ को शीर्ष तीन टोली र प्लेअफ क्वालिफायरबाट आउने शीर्ष दुई टोली गरी १० टिमले प्रतिस्पर्धा गर्ने छन् ।

वर्ल्ककप क्वालिफायरमा नेपाल यूएईलाई ९ रनले पराजित गर्दै शीर्ष तीन टोलीमा रहेर छनौट भएको हो । यो खेलमा पनि आज गुल्सनलाई साथ दिएका भीम सार्कीले सबैभन्दा धेरै ६७ रन बनाएका थिए ।

१७ वर्षीय अलराउन्डर गुल्सनले राष्ट्रिय टोलीमा सेप्टेम्बर २०२१ मा स्थान बनाएका थिए । अमेरिकाविरूद्धको खेलबाट राष्ट्रिय टोलीमा स्थान पाएका उनी सर्लाही मलंगवाका हुन् ।

गुल्सनले भारतको राँचीस्थित अरूणोदय क्रिकेट एकेडेमीमा क्रिकेट सिके । राँचीमा क्रिकेट सिक्दा उनले बलिङमा निखार ल्याए । उनले स्थानीय प्रतियोगिता खेले पनि ।

यूएईविरुद्ध गुल्सनले दुई पटक साहसिक इनिङ खेले । दुवैपटक यूएईको सपनामा पर्खाल बने । उनले आफूलाई ‘बिग म्याच प्लेयर’को परिचय दिँदै गर्दा यूएई टोलीको मनमा ड्याङ्ग्रो बज्ने बनाए ।

यो पनि पढ्नुहोस्

क्रिकेटमा नेपाली क्रेज : अधैर्य खेलाडी, धैर्य दर्शक