काठमाडौँ । सरकारले रेशम चौधरीको बाँकी कैद सजाय माफी गर्ने तयारी गरेको छ । टीकापुरमा २०७२ भदौमा ७ जना सुरक्षाकर्मी र एक नाबालकको मृत्यु भएको घटनामा दोषी ठहर भई जन्मकैदको सजाय पाएका उनको बाँकी सजाय माफी गर्ने भएको हो ।

उनको बाँकी जन्मकैदको सजाय माफी गर्न निवेदन गृह मन्त्रालयबाट राष्ट्रपति कार्यालयमा पुगेको छ । यसबारे छलफल गर्न प्रधानमन्त्री पुष्पकमल दाहाल र चौधरीको टिमका प्रतिनिधि राष्ट्रपति निवास पुगेका थिए ।

गृह मन्त्रालयले मुलुकी फौजदारी कार्यविधि संहिता ऐन, २०७४ अनुसार सजाय माफीको प्रक्रिया अघि बढाएर फाइल राष्ट्रपति कार्यालयमा पठाएको हो ।

राष्ट्रपति कार्यालय स्रोतका अनुसार पूर्वसांसदसमेत रहेका चौधरीको कैद माफीसम्बन्धी गृह मन्त्रालयको प्रस्तावमाथि अध्ययन भइरहेको छ ।

यसअघि जिल्ला अदालत कैलाली र उच्च अदालत दिपायलले जन्मकैदको सजाय सुनाएका चौधरीलाई सर्वोच्च अदालतले पनि गत २ जेठमा जन्मकैदको फैसला सदर गरेको थियो ।

चौधरी १५ फागुन, २०७४ देखि डिल्लीबजारस्थित कारागारमा रहँदै आएका छन् । माफी मिनाहाको प्रक्रिया कार्यान्वयन भए उनले १५ वर्ष कैद सजाय मिनाहा पाउने भएका छन् ।