काठमाडौँ । नक्कली भुटानी शरणार्थी प्रकरणमा पक्राउ परेका १७ मध्य ५ जनाको बयान लिन बाँकी छ । बुधबारसम्म काठमाडौँ जिल्ला अदालतका न्यायाधीश प्रेमप्रसाद न्यौपानेको इजलासमा १२ जनाले बयान दिएका छन् ।

अब पूर्वउप्रधानमन्त्री तथा एमालेका निलम्बित सचिवटोपबहादुर रायमाझी, पूर्वगृहमन्त्री तथा नेपाली कांग्रेसका नेता बालकृष्ण खाँण, पूर्वसांसद आङटावा शेर्पा, शरणार्थी नेता टेकनाथ रिजाल र हज समितिका अध्यक्ष शमशेर मियासँग इजलासले बयान लिन बाँकी छ ।

बुधबार गोविन्द चौधरी, नेपाल सरकारका निलम्बित सचिव टेकनारायण पाण्डे, सानु भण्डारी र रामशरण केसीको बयान लिएपछि ५ जनाको बयान लिन बाँकी रहेको हो ।

अहिलेसम्म पक्राउ परेकाहरू इन्द्रजित राई, नरेन्द्र केसी, सन्देश शर्मा, सन्दीप रायमाझी, लक्ष्मी महर्जन, टंक गुरुङ, केशव दुलाल र सागर राईले बयान दिइसकेका छन् ।

अदालतले पक्राउ परेकाहरूसँग १२ गतेबाट बयान लिन सुरु गरेको थियो ।

पछिल्लो पटक जेठ १२ गते पक्राउ परेकी ललितपुरकी ३२ वर्षीया लक्ष्मी महर्जनलाई भने एकैचोटि अदालतमा बयान दिन लगाइएको छ । उनीभन्दा अघि पक्राउ परेका १६ जनालाई भने प्रहरीले पनि बयान लिएको थियो।

उक्त प्रकरणका आरोपितमध्ये १३ जना फरार छन्। नक्कली भुटानी शरणार्थी प्रकरणमा ३० जनाविरुद्ध मुद्दा परेको छ।