काठमाडाैं । नेपाली फिल्मका अभिनेताद्वय आयुष्मान देशराज जोशी र आशिरमान देशराज जोशीले आमा रविना देशराज श्रेष्ठको विवाह गरिदिएका छन् । बिहीबार काठमाडौंको एक रिसोर्टमा भएको विवाह समारोहमा उनीहरुले बेहुलीको भेषमा सजिएकी आमालाई साथमा लिएर मण्डप पुर्‍याएका थिए ।

पूर्व बैंकर रविनाले प्रेमी स्टुआर्ट अलेक्जेन्डर च्यापम्यानसँग विवाह गरेकी हुन् ।

विवाह समारोहमा जोशी परिवारकी बुहारी तथा अभिनेत्री प्रियंका कार्की, अभिनेत्रीद्वय परमिता आरएल राणा र निरिशा बस्नेतको पनि उपस्थिति रहेको थियो ।

च्यापम्यान बेलायती नागरिक हुन् । उनी आफ्नो छोरीसहित विवाहका लागि गत हप्ता नेपाल आएका थिए ।

हजुरआमा बनिसकेकी रविनाको यो विवाहलाई लिएर सामाजिक सञ्जालमा सकारात्मक र नकारात्मक टिका-टिप्पणी भइरहेका छन् ।