काठमाडाैं । अक्षय कुमार यतिबेला आफ्नो करियरको खराब चरणबाट गुज्रिरहेका छन् । लामो समयदेखि अभिनेताले एक पनि हिट फिल्म पाएका छैनन् । यस्तो अवस्थामा उनको पारिश्रमिकमा पनि असर परेको छ । लगातार फ्लप भएका फिल्मका कारण हाइफाई शुल्क लिने कलाकारको सूचीमा शीर्ष स्थानमा रहेका अक्षयले आफ्नो पारिश्रमिक घटाएका छन् ।

मिडिया रिपोर्टका अनुसार अभिनेताले आफ्नो शुल्कमा भारी कटौती गरेका छन्। हरेक फिल्मका लागि ५०–१०० करोड लिने अक्षयले लगातार फ्लप फिल्मका कारण फिल्म ओएमजी २का लागि ३५ करोड लिएकाे खबर सार्वजनिक भएकाे छ ।

लामो समयदेखि अक्षयको कुनै पनि फिल्मले बक्स अफिसमा राम्रो कलेक्सन गर्न सकेको छैन । हालै उनको फिल्म सेल्फीले १६.८५ करोड मात्रै कमाउन सक्याे । जबकि साेहि समयमा रिलिज भएकाे राम सेतुले ७१.८७ करोड कमाएको थियो । अभिनेताको फिल्म रक्षाबन्धनले पनि दर्शकको मन जित्न सकेन । फिल्मले कुल ४४.९८ करोड कलेक्सन गरेको थियो ।

अक्षयको फिल्म सम्राट पृथ्वीराजको पनि निकै आलोचना भएको थियो । फिल्मले ६८.०५ करोड कमाएको थियो । उनले सूर्यवंशीपछि एउटा पनि हिट फिल्म पाएका छैनन् ।