काठमाडौं । प्रहरी चारित्रिक प्रमाणपत्रको प्रमाणीकरणका लागि अब देखि सास्ती ब्यहोर्नु नपर्ने भएको छ । अब अनलाइनबाटै प्रहरी चारित्रिक प्रमाणपत्र प्रमाणीकरण हुने भएको छ । सरकारले आजदेखि औपचारिक रुपमा अनलाइनमार्फत चारित्रिक प्रमाणपत्र प्रमाणीकरण गर्ने भएको हो। परराष्ट्रमन्त्री एनपी साउदले अनलाइनमार्फत प्रहरी चारित्रिक प्रमाणपत्र प्रमाणीकरण सेवाको आज एक समारोहका बीच उद्घाटन गर्ने परराष्ट्र मन्त्रालयले जनाएको छ ।

अनलाइनबाटै आवेदन दिने र प्रमाणीकरण हुने भएपछि अध्ययन तथा रोजगारीका लागि विदेश जाने नेपालीले काठमाडौंको त्रिपुरेश्वरस्थित कन्सुलर सेवा विभाग धाउनुपर्ने बाध्यता हट्ने सरकारको भनाई छ ।

अनलाइनबाटै राजस्व भुक्तानी गर्न सकिने विभागले जनाएको छ ।

चारित्रिक प्रमाणपत्रका लागि सेवाग्राही आफै आउनु पर्दा भीडभाड हुने गरेको छ । अनलाइनमार्फत सेवा प्रवाह भएपछि सेवाग्राही र विभाग दुवैलाई सहज हुने बताइएको छ । सरकारले सेवागा्रहीलाई छिटो र सहज ढंगले सेवा उपलब्ध गराउने नीति लिएपछि यस्तो ब्यवस्था गर्न लागिएको बताइएको छ ।