काठमाडौं । संघीय सदन अन्तर्गतका दुई सदनको गतिरोध अन्त्यका लागि प्रधानमन्त्री पुष्पकमल दाहालले बोलाएको बैठकमा सहमति हुन सकेन ।

सत्तापक्ष र प्रतिपक्ष आ–आफ्नै अडानमा कायम रहेपछि बैठक बिनानिष्कर्ष सकिएको हो ।

१० साउनदेखि संसद अवरुद्ध छ । सदन सञ्चालन गर्ने विषयमा छलफल गर्न प्रधानमन्त्री दाहाले संसद्मा भएका प्रमुख दलहरुको बैठक बोलाएका थिए । सिंहदरबारमा भएको छलफलमा प्रमुख प्रतिपक्षी नेकपा एमालेले सुन तस्करीको छानबिनका लागि उच्चस्तरीय आयोग गठन गर्नैपर्ने अडान लिएको छ ।

उपप्रधान तथा गृहमन्त्री नारायणकाजी श्रेष्ठले आयोग वा समिति बन्दा नेपाल प्रहरीको केन्द्रीय अनुसन्धान ब्यूरो (सीआईबी)ले गरिरहेको अनुसन्धान प्रभावित हुनसक्ने चिन्ता व्यक्त गरेका थिए ।

सीआईबीले पाएको समय अब दुई साता मात्र छ । त्यसैले त्यो बेलासम्म हेर्ने कि भन्ने पनि छलफल भएको राष्ट्रिय स्वतन्त्र पार्टी (रास्वपा)का सभापति रवि लामिछानेले जानकारी दिए ।

उनले अघि भने, ‘एकदम नजिक पुगेको हुनाले एउटा बैठकले टुंगोमा पु¥याउने र सदन जसरी पनि सञ्चालन गर्ने कुराकानी भएको छ ।’

स्रोतका अनुसार आजको संसदको बैठक सूचना टाँसेर स्थगित गर्ने तयारी भएको छ ।

रास्वपा सभापति लामिछानेका अनुसार आजको प्रतिनिधि सभा बैठक भने स्थगित हुने सम्भावना छ। सोमबार अपराह्न ४ बजे सर्वदलीय बैठक राख्ने तयारी छ।