काठमाडौँ । असार १० गतेदेखि अनशनरत बाँकेको बैजनाथपुर ६ की आरती रावल (गिरी) र सरकारबीच दुई बुँदे सहमति भएको छ। आफ्नो जिउ ज्यानको सुरक्षा मागसहित अनशनरत हाल नेपालगञ्ज उपमहानगरपालिका–९ बस्ने आरतीसँग भएको सहमतिसँगै अनशन पनि तोडिएको छ।

आफ्नो श्रीमानविरुद्ध वैवाहिक बलात्कार र बलात्कार मुद्दा अदालतमा विचाराधीन रहेको अवस्थामा सुरक्षा माग राखी आरती माइतीघर मण्डलमा अनशनरत थिइन्।

सहमतिअनुसार अब शान्ति सुरक्षाका लागि गृह मन्त्रालयले मातहत निकायलाई आवश्यक निर्देशन दिने भएको छ।

सहमति पत्रमा आरती र गृह मन्त्रालयको तर्फबाट उपसचिव कुल बहादुर जिसीले हस्ताक्षर गरेका छन्।