काठमाडौं । नेपाली कांग्रेसका सहमहामन्त्री महेन्द्र यादवमाथि खुकुरी प्रहार गर्ने नुवाकोट घर भएर काठमाडौंको बालाजुमा बस्ने श्यामबाबु सापकोटा पहिला पनि पक्राउ परेको खुलेको छ ।

बुधबार दिउँसो काठमाडौंको भृकुटीमण्डपमा सहमहामन्त्री यादवमाथि खुकुरी प्रहार गरेपछि पक्राउ गरेर प्रहरीले सिंहदरबार वृत्तमा राखेका सापकोटा २०७८ सालमा दुई पटक पक्राउ परेको देखिएको प्रहरीले जनाएको छ ।

सापकोटाको आपराधिक पृष्ठभूमि पनि केलाउँदा यसअघि उनी दुईपटक पक्राउ परिसकेको देखिएके प्रहरीले जनायो ।

सापकोटालाई २०७८ सालमा प्रहरी वृत्त बानेश्वर र प्रहरी वृत्त सोह्रखुट्टेले पक्राउ गरेर अभद्र व्यवहारको मुद्दा चलाएको देखिएको हो ।

पहिलोपटक बानेश्वरमा सरकारी कर्मचारीमाथि कालोमोसो दलेको आरोपमा उनीमाथि अभद्र व्यवहारको कसुरमा मुद्दा चलाइएको र दोस्रोपटक प्रहरीसँग दुर्व्यवहार गरेको आरोपमा प्रहरी वृत्त सोह्रखुट्टेले पक्राउ गरी अभद्र व्यवहारको मुद्दा चलाएको प्रहरीले जनाएको छ ।

प्रहरीले सापकोटाको घरमा खानतलासी र उनको मोवाइल फोन पनि नियन्त्रणमा लिएर अनुसन्धान गरिरहेको जनाएको छ ।

आफूलाई हिन्दु राष्ट्र पक्षधर र राजावादी भनेर चिनाएका सापकोटाले यादवमाथि किन खुकुरी प्रहार गरे भन्ने खुलेको छैन ।

खुकुरी प्रहार गरेपछि उनले ‘एमसिसी खारेज गर, राष्ट्रियता जिन्दावाद, हिन्दु राष्ट्र कायम गर’ भन्ने नारा लगाएका थिए ।