काठमाडौं । नेपालको फुटबलको सर्वोच्च निकाय अखिल नेपाल फुटबल संघ (एन्फा)का बहुमत सदस्यले अध्यक्ष पंकजविक्रम नेम्वाङ र महासचिव किरण राईलाई बर्खास्त गर्न माग गरेका छन् । ८६ सदस्यीय साधारण सभाका ४८जनाले हस्ताक्षर गरेर अध्यक्ष–महासचिवको बर्खास्ती माग गर्दै वरिष्ठ उपाध्यक्ष वीरबहादुर खड्कालाई पत्र बुझाएका हुन् ।

एन्फा पूर्वअध्यक्ष कर्माछिरिङ शेर्पाको नेतृत्वमा ४८ सदस्यले लिखित निवेदन दिएका हुन् । अध्यक्ष र महासचिवलाई बर्खास्त गर्ने विषयसूची खुलाएर एन्फा वरिष्ठ उपाध्यक्ष खड्कालाई लिखित माग बुझाएको संकटा क्लबका अध्यक्ष इन्द्रमान तुलाधरले जानकारी दिए ।

एन्फा कार्यसमितिको बहुमतले अध्यक्षलाई अस्थायीरुपमा अर्को साधारणसभासम्मलाई निलम्बन गर्न सक्छ भने महासचिवलाई बर्खास्त गर्न सक्नेछ । अध्यक्षलाई बर्खास्त गर्न साधारण सभाको दुईतिहाइ चाहिन्छ ।

एन्फा कार्यसमिति र साधारणसभा दुवैमा अध्यक्ष नेम्वाङ अल्पमतमा छन् । अल्पमतको अध्यक्षले कुनै पनि निर्णय गराउन सक्ने हैसियत राख्दैनन् ।

एन्फा विधानको धारा ४१ मा अध्यक्षको बर्खास्तीसम्बन्धी व्यवस्था छ । त्यस बमोजिम साधारण सभाबाट बर्खास्तीको प्रस्ताव पारित हुन उपस्थितिको दुई तिहाइको समर्थन चाहिन्छ । यदि सबै थप ७ जना सदस्य जुटाए एन्फा अध्यक्ष पदमुक्त हुनेछन् । बर्खास्तीको प्रस्ताव पेश गरिएको ३० दिनभित्र साधारण सभा बोलाउनुपर्ने प्रावधान रहेको छ । साधारणसभाले मतदानबाट निर्णय लिन्छ ।

साधारणसभाअघि कार्यसमिति बैठक बोलाएर अध्यक्षलाई निलम्बन गर्ने असन्तुष्ट समूहको योजना छ । कार्यसमितिमा १८ सदस्यमध्ये असन्तुष्ट पक्षमा ११ जना छन्,

असन्तुष्ट समूहले वरिष्ठ उपाध्यक्षलाई बुझाएको प्रस्तावमा अध्यक्षमाथि १९ बुँदे आरोप लगाएका छन् ।