दाङ। लुम्बिनी प्रदेशका मुख्यमन्त्री डिल्लीबहादुर चौधरीले संघीयताको पूर्ण कार्यान्वयनका लागि प्रदेश सरकार अधिकार सम्पन्न हुनु पर्ने बताएका छन् । त्यो भूमिका संघीय सरकारले निर्वाह गर्नु पर्ने बताए । प्रदेश सरकार र स्थानीय सरकारले पूर्ण अधिकार नपाएको भन्दै तत्काल अधिकार सम्पन्न गराउन संघीय सरकारसंग आग्रह समेत गरे ।

गाउँपालिका महासंघको आयोजनामा दाङको भालुवाङमा शुक्रवार भएको स्थानीय सरकार र प्रदेश सरकारबीच प्रदेशस्तरीय परामर्श गोष्ठि कार्यक्रमलाई सम्वोधन गर्दै मुख्यमन्त्री चौधरीले यस्तो बताएका हुन् ।

संघले अधिकार तल्लो तहमा नदिदा कार्य सम्पादनमा समस्या भइरहेको र त्यसको असर संघियताको कार्यान्वयनमा पुगेको उनले बताए । सरकार रहेको तर अधिकारमा सम्पन्न सरकार नहुदा संघीयता समेत कार्यान्वयन नभएको मुख्यमन्त्री चौधरीको तर्क छ । उनले अहिले संघीयतामा आलोचना बढीरहेको भन्दै त्यो अवस्था संघीय सरकारले ल्याएको बताए ।

मुख्यमन्त्री चौधरीले प्रदेश सरकारले पाएको अधिकार समेत संघले दिन नखोज्दा संघीयता कार्यान्वयनमा जटिलता उत्पन्न हुने संकेत देखिएको बताए । ‘अहिले भएको संघीयताको विरोध संघ सरकारकै कारण भएको छ,’उनले भने, ‘संघीयता विफल भए पनि संघकै कारण हुदैछ ।’

संघले पूणर् अधिकार प्रदेशलाई दियो भने मात्रै संघीयता कार्यान्यवन हुने र प्रदेश सरकारको औचित्य पनि पुष्टि हुने मुख्यमन्त्री चौधरीले बताए । उनले स्थानीय र प्रदेश सरकारले साना योजना भन्दा पनि देखिने प्रभावकारी योजनाहरु निर्माण गर्नु पर्ने बताए । साथै सबै योजनाहरु आर्थिक समृद्धिसंग जोडेर जान सकेमा जनताको आयस्तर समेत बढेर जाने बताए ।