काठमाडौं । फुटपाथ व्यवसायी, अभियन्ता ई स् का प्रतिनिधि र काठमाडौं महानगरका प्रतिनिधिबीच भएको वार्ता निष्कर्षविहीन भएको छ । महानगरपालिकाले फुटपाथ ब्यापारीलाइृ हटाउने निर्णयका विरुद्द उभिएरै आन्दोलनमा उत्रेका अभियन्ता ई का प्रतिनिधि र महानगरका प्रतिनिधिका बीचमा आज वार्ता भएको थियो । वार्तामा तत्कालका लागि निश्चित समयका लागि व्यापार गर्न दिने गरी तत्कालीन र दीर्घकालीन रूपमा कसरी व्यवस्थापन गर्ने भन्ने विषयमा कार्ययोजना बनाउने गरी छलफल चलेपनि अन्तिममा वार्ता निष्कर्णविहिन भएको हो ।

छलफल सुरुमा सकारात्मक ढंगले चलेपनि अन्तिममा निष्कर्षविहीन बनेको वार्ताका सहभागीमध्यका एकले मेरोन्यूजलाई जानकारी दिए ।

ईः ले ८ दिनदेखि मेयर र उपमेयरको कार्यालय राष्ट्रिय सभा गृहको गेट अगाडि निरन्तर उभिएर प्रदर्शन गरिरहेका छन् । सोमबार मेयर बालेन शाहले उनलाई ‘वान टु वान’ वार्ताका लागि भन्दै राष्ट्रियसभा गृह अगाडि दुई कुर्सी राखेर बोलाएका थिए । ईः ले आफ्नो टोली आउने भन्दै केही समय मागेका थिए ।

त्यसपछि नगर प्रहरीमार्फत तत्काल आउने भए मात्र वार्ता हुने भन्दै सन्देश पठाइएपछि मेयर र अभियन्ताबीच आरोप–प्रत्यारोप भएको थियो ।

मंगलबार बिहान उपमेयर सुनिता डंगोल पनि अभियन्ता ईः लाई भेट्न पुगेकी थिइन् । त्यसपछि मेयरले वार्ताका लागि ५ सदस्यीय टोली बनाएका थिए । ईः का तर्फबाट पनि ५ सदस्यीय टोली बनाएर वार्ता गरिएको थियो ।

ईःका तर्फबाट गोविन्द नारायणको नेतृत्वमा सञ्जय अधिकारी, प्रज्वलत्ता कार्की, सञ्जय गिरी र राज महर्जन रहेको टोली वार्तामा सहभागी थियो ।

महानगरपालिकाका तर्फबाट महानगरका प्रवक्ता नवीन मानन्धरको नेतृत्वमा वडाध्यक्ष चीनकाजी महर्जन, कानुन विभाग प्रमुख वसन्त आचार्य, कुमार ब्यञ्जनकार र धिरज जोशी सदस्य रहेको टोली वार्तामा थियो ।

वार्तामा महानगरप्रमुख बालेन्द्र र अभियन्ता ई स् भने सहभागी भएनन् ।