काठमाडौँ । काठमाडौंमा जारी त्रिकोणात्मक टी—२० क्रिकेट शृङ्खलामा संयुक्त अरब इमिरेट्स (यूएई) ले हङ्कङलाई ६ विकेटले हराएको छ ।

आइतबार खेलिएको खेलमा हङकङले दिएको १५० रनको लक्ष्य यूएईले ४ विकेट क्षतिमा पुरा गर्यो । जारी प्रतियोगितामा यूएईको यो पहिलो जित हो ।

टस हारेर पहिले ब्याटिङ गरेको हङकङले बाबर हायात र एजाज खानको शतकीय साझेदारी मद्दतमा १४९ रनको स्कोर बनायो। बाबरले ४५ बलमा ५ छक्का र ३ चौकासहित ६६ रन बनाए । एजाजले ४३ बलमा १ छक्का र ३ चौकासहित ४८ रन जोडे ।

जवाफी ब्याटिङमा ओर्लिएको यूएईले भने १८ ओभरमा चार विकेट गुमाएर एक सय ५३ रन बनाउँदै विजय लक्ष्य पार गरेको हो । यूएईका लागि वसिमले १७ बलमा ४० रन बनाए । खालिदले ३२ बलमा ३७ रन जोडे ।

यस्तै अरविन्दले २९ रन, आसिफ खान १२ रन बनाए। त्यस्तै एलिसान सराफुले २० र बसिल हमिदले ११ रन बनाए ।