काठमाडौँ । लियोनेल मेसीले यस बर्षको बालोन डे’अर अवार्ड जितेका छन् । फ्रेन्च फुटबलले हरेक बर्ष प्रदान गर्ने प्रतिष्ठित बालोन डे’अर अवार्ड मेसीले सबैभन्दा बढी आठौँ पटक जितेका हुन् ।

गएराती पेरिसमा सम्पन्न कार्यक्रममा मेसीलाई सो अवार्ड दिइएको हो । अर्जेन्टिनालाई विश्वकप जिताएका मेसीले म्यानचेस्टर सिटीका इर्लिंग हालाण्ड र पिएसजीका किलीयन एम्बाप्पेलाई पछि पार्दै यो अवार्ड जितेका हुन् ।

हालाण्ड पनि यो अवार्डका प्रमुख दाबेदार थिए । उनले सिटीलाई गत सिजनको प्रिमियर लिग र च्याम्पियन्स लिग जिताएका थिए । उनी दोस्रो भए भने एम्बाप्पे तेस्रो तथा म्यानचेस्टर सिटीका केभिन डी ब्रुने चौथो र सिटीकै रोड्री पाँचौं भएका छन् ।

मेसीले बालोन डे’अर अवार्ड यसअघि २००९, २०१०, २०११, २०१२, २०१५, २०१९ र २०२१ मा जितेका थिए ।