काठमाडौं । भुटानी शरणार्थी प्रकरणमा प्रहरीले दोस्रो चरणमो अनुसन्धान र बयान प्रक्रिया गुपचुप रुपमा अगाडी बढाएको छ । त्यसक्रममा अहिले पूर्पक्षमा रहेका पाँच जनासँग प्रहरीले गोप्य रुपमा फेरि बयान लिएको खुलेको छ ।

यसरी बयान लिनेमा विचौलियाहरु रहेको प्रहरी स्रोतको भनाई छ । प्रहरीले उनीहरुसँग दशैपछि मात्र बयान लिएको हो । यसरी प्रहरीले पूर्पक्षमै रहेका र दशैपछि बयान लिएकाहरुमा सानु भण्डारी, केशव दुलाल, सन्देश शर्मालगायत ५ जना रहेको प्रहरी स्रोतले बताएको छ ।

पहिलो चरणको अनुसन्धान सकिएपछि पछि पुन थप परेका जाहेरीलाई आधार बनाएर जिल्ला प्रहरी परिसर, काठमाडौंले अनुसन्धान थालेको थियो ।
त्यसक्रममै परिसरले पुर्पक्षका लागि थुनामा रहेका बिचौलियाहरूलाई झिकाएर बयान गर्न थालेको हो ।
साउनको अन्तिम साता १८ जना पीडितले दिएको जाहेरीका आधारमा प्रहरीले दोस्रो चरणको अनुसन्धान अघि बढाएको र त्यही क्रममा विचौलियाबाट फेरि बयान शुरु गरेको हो ।

तर प्रहरीले निक्कै गोप्य रुपमा मात्र थालेको दोस्रो चरणको अनुसन्धान र पूर्पक्षमा रहेका विचौलियाहरुको पनि गोप्य रुपमा नै लिएको बयानका कारण मुद्दा निष्पक्षताका साथ अनुसन्धान हुनेमा आशंका बढेको छ ।

दोस्रो चरणमा बयान दिएका विचौलियाहरुले पहिलो चरणमा जस्तो बयान पनि फेरेको प्रहरी स्रोत बताउाछ । बयान लिइएका विचौलियाहरुले आफनो बयानमा इन्कारी बयान दिएका छन् । साथमा उनीहरुले अघिल्लो चरणमा जस्तो गरी उच्च पदस्थ हरुको नाम पनि मुछेका छैनन ।

उनीहरुलाई उच्च पदस्थहरुले नै आफना सहयोगीमाफर्त भेटेर बयान फेर्न गरेको आग्रहका आधारमा विचौलियाहरुले दोस्रो चरणको बयानका क्रममा बयान फेरेको प्रहरी स्रोतले बताएको छ ।
पूर्वमन्त्रीद्वय बालकृष्ण खाण र टोपबहादुर रायमाझीका साथै पूर्वगृहसचिव टेकनारायण पाण्डे, इन्द्रजित राई, पूर्वसभासद् आङटावा शेर्पा, भुटानी शरणार्थी नेता टेकनाथ रिजाल, हज कमिटीका पूर्वअध्यक्ष शमशेर मियाँ थुनामा छन् ।

खाणका स्वकीय सचिव नरेन्द्र केसी, टोपबहादुरका छोरा सन्दीप, बिचौलियाहरू केशव दुलाल, सानु भण्डारी, सन्देश शर्मा, रामशरण केसी, गोविन्द चौधरी, हरिभक्त महर्जन र सागर राई जेलमै छन् । उनीहरू जिल्ला अदालतको आदेशविरुद्ध उच्च अदालत पुगेका छन् ।

३० जनालाई प्रतिवादी बनाइएकोमा अन्य ११ जना अझै फरार छन् ।