काठमाडौं । आईसीसी ट्वान्टी–२० विश्वकप एसिया छनोट प्रतियोगिताको उत्कृष्ट खेलाडी ओमानका अलराउन्डर अकिब इल्यास चुनिएका छन् । इल्यासले बलिङतर्फ १० विकेट र ब्याटिङतर्फ १०६ रन जोडे ।

नेपालका ओपनर ब्याटर कुशल भुर्तेल उत्कृष्ट ब्याटर चुनिए । घरेलु मैदानमा सम्पन्न प्रतियोगितामा नेपाल उपविजेता हुँदा ओपनर भुर्तेलले १८५ रन बनाएका थिए ।

प्रतियोगिताको उत्कृष्ट बलर ओमानका बिलाल खान चुनिए । ओमानलाई छनोटको उपाधि दिलाउने क्रममा बिलालले ११ विकेट लिए ।

आइतबार त्रिवि क्रिकेट मैदानमा भएको फाइनलमा नेपाललाई सुपर ओभरमा ११ रनले हराउँदै ओमानले प्रतियोगिताको उपाधि जितेको थियो ।

फाइनलमा पुगेका यी दुई टिम आगामी वर्ष अमेरिका र वेस्ट इन्डिजमा हुने ट्वान्टी–२० विश्वकपमा छनोट भएका छन् ।

बेस्ट नेपाली प्लेयर अफ दि सिरिज गुल्सन झा बने ।