काठमाडौं । जाजरकोट केन्द्रविन्दु भएर गत कात्तिक १७ गते राति गएको विनाशकारी भूकम्पबाट मृत्यु हुनेको संख्या १५४ पुगेको छ । गृह मन्त्रालयले आइतबार सार्वजनिक गरेको विवरणमा
भूकम्पबाट जाजरकोट र पश्चिम रुकुममा गरी मृत्यु हुनेको संख्या १५४ पुगेको उल्लेख छ ।

यसअघि गृहले गत कात्तिक २२ गते सार्वजनिक गरेको विवरणमा १५३ जनाको मृत्यु भएको उल्लेख थियो । आज सार्वजनिक विवरणमा एक जना थपिएर १५४ जना पुगेको उल्लेख छ । भुकम्पमा परेर ३३६ जना घाइते भएका छविवरणमा उल्लेख छ ।

भुकम्पमा २६ हजार ५५७ वटा घरमा पूर्ण क्षति भएको गृहको विवरणमा उल्लेख छ ।

छिमेकी जिल्ला रुकुम पश्चिममा सबैभन्दा बढी घर ध्वस्त भएको विवरणमा उल्लेख छ । त्यहाँ १६ हजार ५७० घर पूरै ध्वस्त भएको उल्लेख छ ।

जाजरकोटमा मात्रै ९ हजार ७९४ वटा घरमा पूर्ण रुपमा क्षति पुगेको पाइएको छ ।

यसैगरी सल्यानका १५१, रोल्पाका २५, रुकुम पूर्वका ९, जुम्लाका ५ तथा बैतडी र कालीकोटका १–१ वटा घर पूर्ण रुपमा ध्वस्त भएका छन् ।

त्यस्तै ३५ हजार ४५५ वटा घरमा आंशिक क्षति पुगेको विवरण उल्लेख छ । जसमध्ये सबैभन्दा धेरै जाजरकोटमा भएको पाइएको छ । त्यहाँका २४ हजार ७०७ घरमा आंशिक क्षति पुगेको छ ।

त्यसैगरी रुकुम पश्चिमका ९ हजार ९६१ घरमा आंशिक क्षति पुगेको पाइएको छ ।

कतिपय घर ३ दिनपछि फेरि आएको अर्को भूकम्पले भत्किएका थिए ।