काठमाडौं । पूर्वप्रधानमन्त्री डा. बाबुराम भट्टराई नेतृत्वको नेपाल समाजवादी पार्टी (नेसपा)ले पार्टीको केन्द्रीय समितिको बैठक बोलाएको छ ।
मंसिर ६ र ७ गते काठमाडौंमा बस्ने गरी बैठक बोलाइएको नेसपाका नेताहरुले बताएका छन् । माओवादीसँगको एकताका विषयमा नेसपाभित्र दुई थरी मत छ । बाबुराम भटटराई तत्काल एकता गर्न नहुने पक्षमा छन् । तर अर्का अध्यक्ष महिन्द्रराय यादव भने विगतमा भएको सहमति अनुसार एकतामा लचक बन्नुपर्ने पक्षमा छन् ।

गत वर्षको मंसिरको चुनावमा नेसपाले माओवादी चुनाव चिन्ह्रमा चुनाव लडेको थियो । यादव त्यही अनुसार अहिले सांसद र मन्त्रीसम्म छन् ।

नेसपाको बैठकमा पार्टी एकताका लागि माओवादी केन्द्रले पठाएको पत्र, एकीकरणका लागि समायोजन समिति बनाउने विषयमा छलफल हुने पार्टीले जनाएको छ ।

यस्तै नेसपाको जारी अभियान, सङ्गठन सुदृढीकरणलगायत विषयमा पनि छलफल हुने नेसपाको नेताहरुले बताएका छन् ।

बैठकले आगामी वैशाखमा महाधिवेशन गर्ने वा नगर्नेबारे निर्णय पनि गर्नेछ ।

यसअघि असोजको तेस्रो साता बसेको कार्यकारिणी बैठकले माओवादीले पठाएको पत्रलाई अस्वीकार गर्दै यसअघि एकताका लागि पठाएको नौ बुँदे आधार पत्रको जवाफ नआएसम्म वार्ता नगर्ने निर्णय गरेको थियो ।

पार्टीका सहअध्यक्ष गङ्गानारायण श्रेष्ठको नेतृत्वमा रहेको वार्ता टोलीमा एक जना थप गरी विचार, नीति र सिद्धान्त मिल्ने राजनीतिक दलसँग छलफल खुला राख्ने निर्णय गरेको थियो ।