काठमाडाैं । सीजी होल्डिङ्सको अटोमोटिभ डिभिजन तथा नेपालका लागि सुजुकी गाडीको आधिकारिक बिक्रेता सीजी मोटोकर्पले देशव्यापी रूपमा ‘विन्टर फ्री सर्भिस क्याम्प’ आयोजना गर्ने भएको छ । उक्त क्याम्प माघ २५ देखि २७ गतेसम्म सञ्चालन हुने कम्पनीले जनाएको छ ।

जाडो मौसममा सवारी साधनमा देखिन सक्ने प्राविधिक समस्या र कार्यक्षमतामा पर्ने असरलाई मध्यनजर गर्दै सुजुकीले आफ्ना ग्राहकहरूका लागि यो विशेष क्याम्प आयोजना गर्न लागेको हो । चिसो मौसमले ब्याट्री, हिटर, एसी तथा अन्य मेकानिकल पार्ट्समा असर पार्न सक्ने भएकाले समयमै सवारी जाँच तथा मर्मत गराउन कम्पनीले सुझाव दिएको छ । क्याम्पको उद्देश्य ग्राहकलाई चिसो मौसममा गाडी सुरक्षित र दुरुस्त राख्ने विषयमा सचेत गराउनु र गुणस्तरीय सेवा प्रदान गर्नु रहेको सीजी मोटोकर्पले जनाएको छ ।

क्याम्पअन्तर्गत सुजुकीका ग्राहकहरूले निःशुल्क सवारी जाँच, मर्मतसम्भारमा विशेष छुट तथा अनुभवी प्राविधिकबाट आवश्यक सल्लाह पाउनेछन् । यस अवसरमा एसी र हिटरको निःशुल्क जाँच, ब्याट्री चेकअप, एसडीटी जाँच तथा सम्पूर्ण गाडीको वृहत् निरीक्षण गरिनेछ । साथै लेबर चार्जमा २० प्रतिशतसम्म र स्पेयर पार्ट्स तथा इन्जिन आयलमा १० प्रतिशतसम्म छुट उपलब्ध गराइनेछ ।

सर्भिस क्याम्पका क्रममा आकर्षक उपहार योजना पनि राखिएको छ । सहभागी ग्राहकहरूमध्ये ८ जना भाग्यशाली जोडीले नगरकोटस्थित भङ्गेरी दरबार रिसोर्टमा स्टेकेसन प्याकेज जित्ने अवसर पाउनेछन् ।

यो ‘विन्टर फ्री सर्भिस क्याम्प’ नेपालभर रहेका सुजुकीका सबै सर्भिस सेन्टरहरूमा सञ्चालन हुनेछ । हाल देशभर ५४ वटा सर्भिस आउटलेटसहित सुजुकी नेपालकै सबैभन्दा ठूलो सर्भिस नेटवर्क भएको ब्रान्डका रूपमा परिचित छ ।