काठमाडौं । नेपाल आईसीसी यू–१९ विश्वकपमा पहिलो पटक न्युजिल्यान्डसँग पराजित भएको छ ।

दक्षिण अफ्रिकामा जारी आईसीसी यू-१९ विश्वकपमा नेपाल न्युजिल्यान्डसँग ६४ रनले पराजित भएको हो । युवा ब्याटर अर्जुन कुमालको उत्कृष्ट ब्याटिङका बाबजुद नेपाल पराजित हुन पुग्यो ।

न्युजिल्यान्डले दिएको ३ सय ३ रनको विशाल लक्ष्य पछ्याएको नेपालले निर्धारित ५० ओभरमा ९ विकेट गुमाएर २३८ रन बनायो।

नेपालका लागि अर्जुन कुमाल शतक बनाउनबाट चुके। १ सय ४ बलमा १२ चौका हानेका अर्जुन ३७।२ ओभरमा ९० रन बनाउँदा क्याच आउट भए ।उनले बनाएको ९० रन नै सर्वाधिक रह्यो।

यस्तै कप्तान कप्तान देव खनाल ३६ रनमा क्याच आउट भए। ओपनर दिपक बोहोरा शुन्य र आकाश त्रिपाटी २ रनमा क्याच आउट भए।

सुवास भण्डारी ३३ र तिलक भण्डारी १७ रनमा नटआउट रहे। आकाश चन्दले १४ रन थपे।

यस्तै गुल्सन झा २ रनमा क्याच आउट भए। विकेट किपर उत्तम मगर शून्य रनमा आउट भए।

न्युजिल्यान्डका माट रोवेले ३ विकेट लिए। एवाल्ड ओस्कार ज्याक्सनले समान २ विकेट लिए। यस्तै मासोन क्लार्क, ओस्कार ज्याक्सन, ज्याक कुमिन्सले समान एक एक विकेट लिए ।

त्यसअघि इष्ट लन्डनको बुफेलो पार्कमा न्युजिल्यान्डले टस जितेर ब्याटिङ गरेको न्युजिल्यान्डले निर्धारित ५० ओभरमा ८ विकेटको क्षतिमा ३ सय २ रनको विशाल योगफल बनाएको थियो ।