जनकपुरधाम । कमला नदीमा नयाँ पुल निर्माणको माग गर्दै मधेस प्रदेशको मुख्यमन्त्री तथा मन्त्रिपरिषद्को कार्यालयअगाडि युवाहरु आमरण अनसनमा बसेका छन्।

मंगलबार इन्जिनियर प्रविणकुमार यादवको नेतृत्वमा सिरहाको सिरहा नगरपालिका र औरही गाउँपालिकाका १० जना स्थानीय तथा जनप्रतिनिधि पुल निर्माणको माग गर्दै आमरण अनसनमा बसेका हुन्।

इन्जिनियर यादवले गत असार २७ गते मुख्यमन्त्रीलाई ७ दिने अल्टिमेटम दिएर ज्ञापनपत्र बुझाएकोमा त्यसमा सरकारले चासो नदिएपछि अनसनमा बसेको बताए। आठौँ दिन बित्नलाग्दासमेत कुनै पहल नभएपछि आफूहरु बाध्य भएर अनसनमा बसेको उनको भनाइ छ।

हुलाकी राजमार्गअन्तर्गत निर्माण भएर भत्केको पुल विवादित रहेको र सो पुलमा धेरै त्रुटि रहेको भन्दै उनले १० वर्षमा समेत पुलको निर्माण नहुने टिप्पणी गरे।

यादवले भत्केको पुल निर्माणमा १५ करोड रुपैयाँ लाग्ने भएकोले बीमा कम्पनीले दिने कि ठेकेदारले दिने भन्ने विवाद अहिलेसम्म नसल्टिएको र सल्टिने अवस्थासमेत नरहेको बताए।

‘प्रदेश सरकार भइसकेपछि त्यसपछि पनि बारम्बार केन्द्र सरकारमै जानुपरे प्रदेश सरकारको के काम छ? कल गडाउने र मन्दिर बनाउने?’, उनले अगाडि भने, ‘गत वर्ष १४ अर्ब रकम फ्रिज भयो। सो रकममा १४ वटा पुल बन्थ्यो। त्यो सानोतिनो पुल पनि होइन। एउटा पुलले गर्दा २० लाख मानिस प्रभावित छ।’