काठमाडौं । नेपालमा पहिलोपटक क्यानोनिङ उत्सव हुँदैछ ।

सिन्धुपाल्चोकको गातीस्थित बोर्डरल्याण्डमा आजदेखि (फागुन १६) देखि १८ सम्म तीन दिने क्यानोनिङ उत्सव हुँदैछ ।

बोर्डरल्याण्ड इको रिसोर्टले आयोजना गर्न लागेको यो उत्सव विशेषगरी शाहसिक खेलमा रुची राख्ने नेपालीहरूलाई लक्षित गरिएको छ । पर्वतारोहण, पदयात्रा, र्‍याफ्टिङ, प्याराग्लाइडिङ, माउन्टेन बाइकिङ तथा मह संकलनजस्ता रोमाञ्चक गतिविधिहरु समेटिएको क्यानोनिङ उत्सव साहसिक पर्यटकहरुको आकर्षण बन्ने अपेक्षा गरिएको छ ।

नेपालमा क्यानोनिङका लागि विभिन्न स्थानहरु प्रसिद्ध छन् । जसमध्ये काठमाडौँको सुन्दरीजल, सिन्धुपाल्चोकको पुरानो जम्बो, पोखरा र चितवनको जलबिरे प्रमुख हुन् । नेपाल नदी संरक्षण (एनआरसिटी) का अध्यक्ष तथा कर्णाली रिभर वाटरकिपरसमेत रहेका बोर्डरल्याण्ड इको रिसोर्टका सञ्चालक मेघ आले उत्सवका क्रममा सञ्चालन गरिने विभिन्न शाहसिक खेलहरुमा सहभागीहरुको सुरक्षालाई प्राथमिकतामा राखिएको बताए । ‘क्यानोनिङ गर्दा पानीको बहाव, भौगोलिक स्थिति र खेलाडीहरुको सुरक्षामा विशेष ध्यान दिएका छौं । वसन्त ऋतुमा नेपालमै पहिलोपटक व्यापक कार्यक्रम सहित क्यानोनिङ उत्सव आयोजना गर्दै छौं,’ उनले भने ।

आलेका अनुसार नेपालमा क्यानोनिङ गर्न मिल्ने ९ वटा झरनाहरु सिन्धुपाल्चोकमा छन् । यी झरनालाई प्रवद्र्धन गर्न महोत्सव आयोजना गर्न लागिएको आलेले को बताए । ‘यस उत्सवमा करिब डेढ सयदेखि २ सयको हाराहारीमा आन्तरिक पर्यटकहरुको सहभागिता रहने अपेक्षा लिएका छौं,’ उनले भने ।

शाहसिक खेल प्रेमीहरुका लागि पर्वतारोहण, पदयात्रा, र्‍याफ्टिङ मात्र नभई क्यानोनिङ पनि आकर्षक गन्तव्य बन्दै गएको उनको अनुभव छ । यसमा आन्तरिक तथा बाह्य पर्यटकहरुको उल्लेखनीय सहभागिता रहने अपेक्षा गरिएको छ । ‘साहसिक खेलप्रति बढ्दो आकर्षणले आगामी दिनमा यस क्षेत्रमा अझै व्यावसायिक हुने आशा जगाएको छ,’ आलेको भनाइ छ ।

डोरीको नट् र पौडिन चाहनेका लागि क्यानोनिङ रोमाञ्चकमात्र नभई सुरक्षितसमेत बताउँछन् कार्यक्रम निर्देशक मदन मगर । मगरले यस कार्यक्रमका लागि १० देखि १५ जना क्यानोनिङ गाइड तथा २५ जना स्वयंसेवक खटाइने जानकारी दिए । कार्यक्रममा सहभागीहरुलाई मनोरञ्जनको पूर्ण प्याकेज उपलब्ध गराइने आयोजकको प्रतिबद्धता छ ।

क्यानोनिङ उत्सवमा सहभागी हुन चाहनेले बोर्डरल्याण्ड इको रिसोर्टको फेसबुक, इन्स्टाग्रामको पेज वा नयाँ बजार र ठमेलस्थित कार्यालयमा नाम दर्ता गराउन सक्नेछन् ।