इस्तानबुल । इजरायली खुफिया एजेन्सी मोसादको लागि काम गर्दा एक टर्किस परिवारलाई ठूलो चोट लागेको छ । उनीहरु सबैलाई जासुसी गरेको आरोपमा कडा सजाय सुनाइएको छ । 

यो घटनाले टर्कीका सुरक्षा एजेन्सीहरूको सतर्कता मात्र देखाउँदैन, विदेशी एजेन्सीहरूले कसरी देशको आन्तरिक सुरक्षामा हस्तक्षेप गर्छन् भनेर पनि देखाएको टर्कीको मिडियाले जनाएका छन ।

इस्तानबुलको एक अदालतले यस जासुसी मुद्दामा सबैलाई जम्मा १०० वर्षको सजाय सुनाएको छ। यो मामला अप्रिल २०२३ को हो, जब टर्कीको राष्ट्रिय खुफिया एजेन्सी एमआईटीले ठूलो कारबाही गर्‍यो र धेरै संदिग्धहरूलाई पक्राउ गर्‍यो। अनुसन्धानका क्रममा यी व्यक्तिहरू इजरायलको गुप्तचर एजेन्सी मोसादका लागि काम गरिरहेको खुलासा भएको थियो ।

यी संदिग्धहरू मोसाद एजेन्टहरूसँग मात्र सम्पर्कमा थिएनन्,  तिनीहरूले धेरै महत्त्वपूर्ण जानकारी पनि मोसादसँग साझा गरेका थिए । यस मामिलामा सबैभन्दा ठूलो नाम प्रकाशमा आएको थियो, अहमद एरसिन तुम्लुकाली, जो एक बीमा कम्पनीका मालिक हुन्। उनी जासुसी नेटवर्कको प्रमुखको रूपमा वर्णन गरिएको छ ।

अदालतले उनलाई २२ वर्ष ६ महिनाको जेल सजाय सुनाएको छ,  जुन ‘राम्रो व्यवहार’ को आधारमा घटाएर १८ वर्ष ९ महिनामा कायम हुन सक्नेछ । उनकी श्रीमती बेनान तुम्लुकालीलाई १६ वर्ष ८ महिना र छोरी डिला सुल्तान शिमशेकलाई १५ वर्ष ७ महिना १५ दिनको जेल सजाय सुनाइएको छ ।

अदालतले यस परिवारका अन्य तीन सहयोगीलाई पनि यस्तै सजाय सुनाएको छ । उनीहरु सबैलाई विदेशी गुप्तचर निकायका लागि जासुसी गर्ने, राष्ट्रिय सुरक्षा विरुद्धको गतिविधिमा संलग्न रहेको र गोप्य सूचना सङ्कलन गर्ने जस्ता गम्भीर आरोपमा दोषी ठहर गरिएको थियो । यो सजाय इस्तानबुलको २३ औं भारी दण्ड अदालतले दिएको हो ।

अभियोजकहरूले आफ्नो आरोपपत्रमा भने कि यी अभियुक्तहरू ‘अनलाइन अपरेसन’ ह्यान्डल गर्ने मोसाद इकाईका लागि काम गरिरहेका थिए। तिनीहरूको मुख्य काम फोटो निगरानी सञ्चालन गर्ने, लक्ष्यहरूमा नजर राख्ने र टर्की भित्र वा बाहिर गोप्य जानकारी सङ्कलन थियो। केही सूचनाहरू युद्ध र द्वन्द्वका कारण टर्कीमा शरण लिएका विदेशी नागरिकहरूसँग सम्बन्धित थिए।

यो कारबाहीलाई टर्कीमा रहेको मोसाद नेटवर्कका लागि ठूलो धक्काको रूपमा हेरिएको छ। यसअघि पनि टर्कीले धेरै पटक मोसादसँग सम्बन्धित गतिविधिको पर्दाफास गरिसकेको छ । पछिल्लो केसले देखाउँछ कि टर्की अब आफ्नो सुरक्षाको मुद्दामा आराम गर्न चाहँदैन र देशमा विदेशी खुफिया नेटवर्कहरू विरुद्ध कडा रवैया अपनाइरहेको छ।