काठमाडौं । केपी ओली प्रधानमन्त्री पदबाट पदमुक्त भएसँगै नयाँ सरकार गठनको तयारीमा रहेको नेपाली कांग्रेस पदाधिकारीको बैठक सकिएको छ । कांग्रेसले पदाधिकारी तथा पूर्व पदाधिकारीको आज पार्टी सभापति शेरबहादुर देउवा निवास बुढानीलकण्ठमा बैठक बसेर कांग्रेसकै नेतृत्वमा सरकार गठन गर्ने र त्यसका लागि दाबी गर्ने निर्णय गरेको छ ।

कांग्रेसले जनता समाजवादी पार्टी (जसपा) सिंगो पाटीलाई एकताबद्ध बनाएर अझै कांग्रेसको नेतृत्वमा ल्याउन पहल गर्ने र एमालेकै माधव नेपाल पक्षसँग छलफल गर्ने निश्कर्ष निकालेको छ ।

बैठकपछि सहमहामन्त्री डा. प्रकाशरण महतले सञ्चारकर्मीहरुसँग भने, ‘प्रधानमन्त्रीले विश्वासको मत लिन असफल हुनुभएको छ । राष्ट्रपतिले ७६(२) अर्न्तगत बहुमतको सरकार बनाउन प्रक्रिया ३० गते बेलुकी ९ बजेसम्म समय दिनुभएको छ । स्वभाविक रुपमा प्रधानमन्त्रीले विश्वासको मत लिन नसकेपछि विपक्षी दल कांग्रेस, माओवादी केन्द्र र जसपाको समर्थनमा हामी दाबी गर्छाैँ । त्यसका लागि आवश्यक बहुमत निकाल्नका लागि कांग्रेस लाग्छ ।’

उनले माओवादी केन्द्रका अध्यक्ष पुष्पकमल दाहाल ‘प्रचण्ड’, कांग्रेसको नेतृत्वमा सरकार बनाउन तयार भएको र जसपाका अध्यक्ष उपेन्द्र यादवले समेत तीन दलको सहमतिमा नयाँ सरकार गठनमा तयार देखिएको बताए ।

तर, जसपाभित्रकै महन्थ ठाकुर पक्ष झै सहमत नभएको र नयाँ सरकार गठनको प्रक्रियामा सहभागी नहुँदा बहुमत कसरी जुटछ् भन्ने सञ्चारकर्मीको प्रश्नमा डा महतले भने, ‘जसपा एकताबद्ध भएर यो अभियानमा सहभागी होस् भन्ने हामी चाहान्छौं । एमालेभित्रकै माधव नेपाल समूह पनि छन् । उहाँहरु हिजो संसदमा उपस्थित हुनु भएन । उहाँहरुसँग पनि हामी छलफल गर्छाैँ । समग्रमा जसपा पनि पक्षमा आउने प्रशस्त सम्भावना छ । यो प्रयत्नलाई हामी जारी राख्छौँ ।’