काठमाडौँ । प्रतिनिधिसभा सदस्य निर्वाचन हुने अघिल्लो दिन बुधवार देशभर विभिन्न ठाउँमा शङ्कास्पद बस्तु भेटिएको छ ।

निर्वाचन बिथोल्न खोज्ने समूहले काठमाडौँको बुढानिलकण्ठ नगरपालिका–२ स्थित चपली र नागार्जुन नगरपालिका वडा नम्बर–२ मा राखेको शङ्कास्पद वस्तु सेनाले निष्क्रिय पारेको छ ।

सुतली बमसहित पर्साको वीरगञ्ज महानगरपालिका-१६ का १९ वर्षीय कृष्ण यादव, १९ वर्षीय रोहित पटेल र १९ वर्षीय अबजित यादवलाई प्रहरीले पक्राउ गरेको छ। 

देशभर १४ ठाउँमा शङ्कास्पद बस्तु भेटिएको नेपाल प्रहरीले जानकारी दिएकाे छ। सबै शङ्कास्पद वस्तुहरू आतङ्कित पार्ने उद्देश्यले नक्कली विष्फाेटक पदार्थ रहेकाे प्रहरीले जनाएकाे छ ।

कोशी प्रदेशको ताप्लेजुङ, मोरङ, सुनसरी र उदयपुरमा शङ्कास्पद बस्तु फेला परेको थियो । मधेस प्रदेशका पर्सा, धनुषा, महोत्तरी र सर्लाहीमा शङ्कास्पद बस्तु भेटिएको प्रहरीले जनाएको छ । कर्णालीको सुर्खेत र सुदूरपश्चिमको कञ्चनपुरमा शङ्कास्पद बस्तु भेटिएको थियो । गण्डकीको बागलुङ र कास्कीमा शङ्कास्पद बस्तु भेटिएको थियो । सबै शङ्कास्पद बस्तु सेनाको डिस्पोजल टोलीले निष्क्रिय बनाएको थियो ।