काठमाडौँ । आर्थिक वर्ष २०७८–७९ को बजेट अध्यादेशमार्फत सिंहदरबारबाट आउने भएको छ । शनिबार बसेको मन्त्रिपरिषद्को बैठकले सवा १६ खर्ब रुपैयाँको बजेटको तयारी गरेको हो ।

गत ८ गते बिहान मन्त्रिपरिषद्को निर्णयले प्रतिनिधिसभा विघटन गरेसँगै यस वर्षको बजेट अध्यादेशमार्फत सिंहदरबारबाट आउन लागेको हो । यसअघि वैशाख २७ गते केपी शर्मा ओलीले प्रधानमन्त्रीमा विश्वासको मत लिन बसेको विषेश बैठकपछि बाहिरिदै संसद जिउँदो रहेकाले बजेट संसदबाट आउने बताएका थिए ।

आज ४ बजे सिंहदरबारबाट अर्थमन्त्री विष्णु पौडेलले बजेट सार्वजनिक गर्ने छन् । बजेट अध्यादेशमा राष्ट्रपति विद्यादेवी भण्डारीले लालमोहर लगाइसकेकी छन् । मन्त्रिपरिषद्को बैठकले बजेट सिफारिस गरी राष्ट्रपतिको कार्यालय शितल निवासमा पठाएको थियो ।

अर्थमन्त्रीका रूपमा पौडेलको यो दोस्रो बजेट हो । पाँच वर्षअघि उनले १० खर्ब ४८ अर्ब ९२ करोड १३ लाख ५४ हजार रुपैयाँको बजेट ल्याएका थिए । त्यसबेला उनी अर्थमन्त्री हुँदा प्रधानमन्त्रीमा केपी शर्मा ओली रहेका थिए ।

गत आर्थिक वर्षको भन्दा यसपटक डेढ खर्ब रुपैयाँले बढीको बजेट हुने छ । सरकारले ३० अर्ब रुपैयाँ निर्वाचनका लागि छुट्याउने तयारी गरेको छ ।