काठमाडौँ । प्रधानमन्त्री केपी शर्मा ओली र जनता समाजवादी पार्टी (जसपा)का अध्यक्ष महन्थ ठाकुर र नेता राजेन्द्र महतो पक्षको भेटवार्ता सकिएको छ । प्रधानमन्त्री निवास बालुवाटारमा बसेको बैठक बिहान १० बजेदेखि दिउँसो २ बजेसम्म चलेको थियो ।

छलफलमा जसपा सरकारमा जाने टुंगो लागेको बैठकमा सहभागी एक नेताले जानकारी दिए । उनका अनुसार सुरुको चरणमा जसपाबाट ७ मन्त्री र दुई राज्यमन्त्रीमा कुरा चलेको छ । यस्तै, पछि एक मन्त्री थप्ने गरी छलफल टुंगिएको छ ।

ती नेताका अनुसार जसपामा देखिएको विवाद चाँडो टुंगोमा पुर्याएर सरकारमा सहभागी बन्ने भएको हो । बैठकमा मधेस आन्दोलन र थरुहट आन्दोलनमा सहभागी नेता कार्यकर्तामाथि लागेका केही मुद्दा फिर्ताबारेमा समते कुरा भएको छ ।

यस्तै, बैठकमा सहभागी नेकपा एमालेका नेता सुवाङ नेम्वाङले जसपाको पहिलेकै मागको निरन्तरता भएको बताए । उनका अनुसार प्रधानमन्त्री ओलीले जसपालाई सरकारमा आउन आग्रह गरेका हुन् ।