काठमाडौँ । खेती गर्ने समयमा मलको अभाव भएको भन्दै हल्ला भएपछि कृषि विकास मन्त्रालयले मलको अभाव नभएको दाबी गरेको छ ।

२० हजार ८६ मेट्रिक टन युरिया, ३९ हजार २ सय ८६ मेट्रिक टन डीएपी, ४ हजार १ सय ४६ मेट्रिक टन पोटास र ४ सय ४४ मेट्रिक टन कृषि चुना रहेको कृषि मन्त्रालयले जनाएको छ ।

त्यस्तै साल्ट ट्रेडिङ कर्पोरेसनसँग १५ हजार २ सय ४ मेट्रिक टन युरिया, १४ हजार ४ सय ४४ मेट्रिक टन डीएपी र ३ हजार ८ सय ९६ मेट्रिक टन पोटास मौज्दात रहेको मन्त्रालयको दाबी छ ।

जम्मा ३५ हजार २ सय ९० मेट्रिक टन युरिया, ५३ हजार ७ सय ३० मेट्रिक टन डीएपी, ८ हजार ४२ मेट्रिक टन पोटास र ४ सय ४४ मेट्रिक टन कृषि चुना मौज्दात रहेको मन्त्रालयका प्रवक्ता डा. श्रीराम घिमिरेले जानकारी दिए ।

उनका अनुसार भारतको कलकत्ताबाट ३० हजार मेट्रिक टन मल, बंगलादेशबाट १९ हजार मेट्रिक टन प्याकिङ भएर ल्याउने तयारी अवस्थामा रहेको र ६५ हजार मेट्रिक टन युरिया मल बाटोमा आउँदै रहेकाले असार पहिलो साताभित्र सबै आउने छ । उनले मलको समस्या कहाँ देखिएको छ ? भन्दै प्रश्न पनि गरेका छन् ।

विगतका वर्षहरुमा जस्तो यो वर्ष मलको अभाव छैन । किसानलाई बालीनाली लगाउने समयमा रासायनिक मलको अभाव हुन नदिने गरी मल वितरण भइरहेको भण्डारीको भनाइ छ ।

सरकारले भारतबाट जीटुजीमार्फत मल ल्याउने सम्झौता गरेको छ । पाँच वर्षका लागि जीटुजीबाट प्रति वर्ष २ लाख मेट्रिक टन रासायनिक मल ल्याउने सम्झौता भएको उनले जानकारी दिए ।

चालु आर्थिक वर्षमा ५ लाख मेट्रिक टन मल आयात गर्नुपर्नेमा ४ लाख मेट्रिक टन अनुदानको मल खरिद भएको प्रवक्ता घिमिरेले बताए । यद्यपी कोरोना भाइरसका कारण सम्बन्धित बिक्री केन्द्र र वितरण गर्ने संस्थामा मल नपुगेको प्रवक्ता घिमिरेले स्वीकार गरेका छन् ।