काठमाडौँ । अवैध हात हतियार बोकेर हिँड्ने दुई जना पक्राउ परेका छन् । इलाका प्रहरी कार्यालय बेलबारीबाट खटिएको प्रहरी टोलीले कटुवा पेस्तोल, राइफलको गोली र खुकुरीसहित २ जनालाई पक्राउ गरेको हो ।

प्रहरीले केराबारी गाउँपालिका ९ देवी झोडा बस्ने ५१ वर्षीय गणेश लिम्बु र बेलबारी नगरपालिका २ बस्ने ४१ वर्षीय पदम कुमार लिम्बुलाई पक्राउ गरेको हो । सूचनाको आधारमा प्रहरीले गणेश लिम्बुको घरमा खानतलासी गर्ने क्रममा ५ वटा गोली, गोली लोड गर्ने चाचर २ वटा, पेस्तोलको गोली एउटा फेला पारेको थियो ।

त्यस्तै, उनकै घरमा पार्क गरेको पदम कुमार लिम्बुको को १ च ८३६८ नम्बरको कारमा खुकुरी र चक्कु फेला पारेको जिल्ला प्रहरी कार्यालय मोरङ डिएसपी मानबहादुर राईले जानकारी दिए । उनीहरूविरुद्ध हातहतियार तथा खरखजना कसुरमा म्याद थप गरी अनुसन्धान भइरहेको प्रहरीले जनाएको छ ।