काठमाडौँ / नेपाली कांग्रेसका सभापति शेरबहादुर देउवाले पार्टीको १४ औं महाधिवेशन तोकिएको समयमा गर्ने गरी तयारी अगाडि बढाउन नेताहरूलाई निर्देशन दिएका छन् । आफ्नो निवास बुढानीलकण्ठमा पदाधिकारी र पूर्वपदाधिकारीलाई बोलाएर आफू समयमै महाधिवेशन गर्न प्रतिबद्ध भएकाले त्यस अनुसार काम अगाडि बढाउन निर्देशन दिएका हुन् ।

अनौपचारिक बैठकमा क्रियाशील सदस्यता छानबिन समितिका सदस्यहरूलाई पनि बोलाइएको थियो । ६ फागुनमा बसेको पार्टी केन्द्रीय कार्यसमिति बैठकले नेता रमेश लेखक नेतृत्वको समितिलाई ३१ जेठसम्म नयाँ र नविकरणको सम्पूर्ण निर्णय गरेर अन्तिम नामावली सभापति देउवालाई बुझाउने निर्देशन दिएको थियो ।

त्यो नामावलीलाई देउवाले प्रमाणित गरि ७ असारमा केन्द्रीय कार्यालयले सदस्यताको अन्तिम नामावली प्रकाशित गर्ने र २० असारमा गाउँ-नगरका वडा अधिवेशन गर्ने कार्यतालिका छ । तर, २५ जेठसम्म क्रियाशील सदस्यता छानबिन समितिले वैशाख ३०, २०७८ मा ४५ जिल्लाका ८० र जेठ १५ गते १६ जिल्लाका २१ स्थान गरी कूल १०१ स्थानको क्रियाशील सदस्यताको नामावलीमात्रै पार्टीको आधिकारिक वेवसाइटमा सार्वजनिक गरेको छ ।

कार्यतालिका अनुरुप क्रियाशील सदस्यताको अन्तिम नामावली बुझाउन १२ दिन मात्रै बाँकी रहँदा अझै ६४ निर्वाचन क्षेत्रको नामावली सार्वजनिक नै भएको छैन । अहिलेसम्म सप्तरी, सिन्धुपाल्चोक, बारा र सोलुखुम्बुमा क्रियाशील सदस्यता वितरण सुरु नै भएको छैन । तर केन्द्रीय कार्यालयले भने सिन्धुपाल्चोक वाहेक सवैतिर शुरु भईसकेको बताउँदै आएको छ । वितरण भएका मध्य प्रदेश–२ का धनुषा, सर्लाही, रौतहट, पर्सा र सिराहामा सदस्यतामा विवाद रहेको छानबिन समितिमा उजुरी परेको छ ।

लुम्बिनी प्रदेशका बर्दिया, बाँके, रुपन्देही, रोल्पा, दाङ, सिन्धुपाल्चोक,काठमाडौं र काभ्रे, प्रदेश–१ का धनकुटा, सुनसरी र मोरङमा तथा सुदूरपश्चिम प्रदेशको कैलालीमा विवाद छ । विवादित स्थानमा बैशाख १६ गतेबाट १० दिनका लागि प्रारम्भिक नामावली पार्टी सर्भरमा इन्ट्रको समय दिइएको थियो । त्यो समय आज सकिएको छ ।

छानबिन समिति स्रोतका अनुसार अहिलेसम्म इन्ट्र पनि पूरा भएको छैन । दुई चरणमा सार्वजनिक गरिएका स्थानमा पनि व्यापक उजुरी परेका छन् । तर, उजुरीको पोको नै समितिले खोलेको छैन ।