काठमाडौं । नेपालमा शुक्रबारदेखि मनसुन सुरु भएको छ । मनसुन भित्रिएसँगै मुलुकका धेरै ठाउँमा वर्षा भएको छ । जल तथा मौसम पूर्वानुमान महाशाखाले विशेष बुलेटिन निकालेर बंगालको खाडी आसपास विकसित भएको न्यूनचापीय क्षेत्रका कारण शुक्रबार नेपालको पूर्वीभागमा मनसुन प्रवेश भएको जनाएको छ ।

मौसम पूर्वानुमान महाशाखाका मौसमविद् राजु प्रधानांगका अनुसार, मनसुन भित्रिएसँगै नेपालमा बागमतीदेखि कर्णालीसम्मको पहाडी क्षेत्र र प्रदेश १ को केही भूभागमा ठूलो पानी पर्ने देखिएको छ ।

मनुसुन भित्रिएसागै यो बर्ष सुरुआतमै पानी पर्न थालेको छ भने आगामी साता मनसुन सक्रिय भई देशका धेरै स्थानमा पानी पर्ने सम्भाबना रहेको प्रधानांगले बताए ।

गत वर्ष मनसुन फैलिएको एक सातापछि मात्रै देशभर वर्षा भएको थियो ।

नेपालमा जेठ अन्तिमदेखि असोज पहिलो सातासम्म मनसुनी वर्ष सुरु हुन्छ । मौसमविद्हरुका अनुसार नेपालमा करिब १ सय दिन सम्म मनसुन सक्रिय हुन्छ ।
जल तथा मौसम विज्ञान विभागले यो वर्ष जेठ १८ देखि असोज १४ सम्मलाई मनसुन अवधि मानेको छ । तर आकलन गरिएको मितिभन्दा एक साताअघि नै मनसुन प्रवेश भएको छ ।

यस वर्ष प्रदेश २ को पूर्वी र प्रदेश १ तराई क्षेत्रबाहेक मुलुकका धेरैजसो स्थानमा मौसम प्रतिकूल रहने पूर्वानुमान महाशाखाले जनाएको छ । नेपालमा वर्षभरि हुने वर्षाको ८० प्रतिशत पानी मनसुनमै पर्ने भएकाले पनि यो समयमा बाढीपहिरोका घटना धेरै हुने गरेका छन् ।

राष्ट्रिय विपत् जोखिम न्यूनीकरण तथा व्यवस्थापन प्राधिकरणले मनसुनी अवधिमा १८ लाख जनसंख्या बाढीपहिरोको उच्च जोखिममा रहेको आकलन गरिसकेको छ । जसमा बाढीबाट १७ लाख र पहिरोबाट एक लाख १७ हजार जनसंख्या प्रभावित हुने देखिएको छ ।

गत वर्ष पहिरोमा परी दुई सय ९६ जनाको मृत्यु भएको थियो भने बाढीमा ४३ जनाको ज्यान गएको थियो । यो वर्ष बाढीपहिरोका घटना अझ बढ्ने आकलन मौसमविद्ले गरेका छन् ।