काठमाडौं । केही दिन यता ब्राहमण एकता बैतडी नामक फेसबुक एकाउन्टबाट नेपाली कांग्रेसका नेताहरुको चरित्र हत्या गर्ने प्रयास गरेको भन्दै कांग्रेस बैतडीले यस्ता तत्वबाट सजक रहन आग्रह गरेको छ । सोमबार एक विज्ञप्ति जारी गदै कांग्रेस बैतडीले ब्राहमण एकता बैतडी नामक फेसबुक एकाउन्ट खोलेर कांग्रेस नेताहरुको चरित्र हत्या गर्ने दुष्प्रयास भएको भन्दै गम्भीर ध्यानाकर्षण भएको जनाएको छ । 

नेपाली कांग्रेसको आसन्न महाधिवेशनलाई प्रभावित तुल्याउने हिसाबले यस्तो कार्य गरिएको ठहर गरिएको छ । यस्तो कार्यमा संलग्न जो कोही भएपनि कानुन अनुसार कारवाही गर्न कांग्रेसले माग गरेको छ ।

यस्ता गतिविधिमा नेपाली कांग्रेसमै आवद्ध भएका व्यक्तिहरुको संलग्नता भएको पाइएमा विधान बमोजीम साधारण सदस्य समेत नरहने गरी कारवाही हुने समेत विज्ञप्तीमा भनिएको छ ।

पछिल्लो समयमा सामाजिक सञ्जाल मार्फत गरिएका दुष्प्रचारका पछि नलाग्न समेत कांग्रेस बैतडीले आफ्ना नेता, कार्यकर्ताहरुलाई अपिल गरेको छ ।

यसैबीच, ब्राह्मण एकता समाजका नाममा फेक आइडी बनाएर समाजिक सद्भाव खलबल्याउने र चरित्र हत्या गर्नलाई कारबाहीको माग गरि काठमाडौंस्थित साइबर ब्यूरोमा आइतबार उजुरी दिएको नेता जनक भट्टले मेरो न्युजलाई जानकारी दिए । केही दिनदेखि काँग्रेस सम्बद्ध व्यक्तिहरुको नाम र तस्वीर राखि ब्राह्मण एकता समाज बैतडी नामको फेक आइडीबाट आफ्नो व्यक्तिगत प्रतिष्ठामाथि आँच आउने काम गरिएको भट्टद्वारा दर्ता गराइएको उजुरीमा उल्लेख छ ।