काठमाडौँ । नेकपा एमालेको दशौँ महाधिवेशन आयोजक कमिटीको बैठक प्रधानमन्त्रीको सरकारी निवास बालुवाटारमा बसिरहेका बेला नेता माधव नेपाल समूहका नेताहरूको बैठक ललितपुरमा शुरु भएको छ । ललितपुर बालकुमारीस्थित नेता कृष्णलाल महर्जनको निवासमा नेपाल समूहका स्थायी समिति सदस्यहरूको बैठक बसेको हो ।

ओली पक्षले पार्टीको महाधिवेशन आयोजक कमिटीलाई भंग गर्दै २०७५ जेठ २ गतेको पार्टी संरचना ब्यूँताउने निर्णय स्थायी समिति बैठकबाट गरिसकेको छ । आज बालुवाटारमा बसिरहेको महाधिवेशन आयोजक कमिटीको बैठकले आयोजक कमिटीलाई भंग गरेर एमालेलाई पुनः केन्द्रीय समितिकै संरचनामा फर्काउने छ ।

त्यसो गर्दा नेकपा माओवादी केन्द्र छोडेर आएका रामबहादुर थापा (बादल)लगायतका नेताहरूको व्यवस्थापन कसरी गर्ने भन्नेमा पनि छलफल हुने बताइएको छ ।

नेपाल पक्षले महाधिवशेन आयोजक कमिटीलाई नचिन्ने भन्दै एमाले र माओवादी एकता भंग भएपछि पार्टी पुरानै संरचनामा फर्किएर क्रियाशील हुनु पर्ने बताउँदै आएको थियो । तर, नेपाल पक्षको यस्तो मागमा ओलीले सुने नसुने झै अटेर गर्दै आएका थिए ।

तर, सर्वोच्चले महाधिवेशन आयोजक कमिटीले गरेका निर्णय केन्द्रीय कमिटी सरह नहुने बताएको र पार्टीभित्र पनि एमाले एकताका लागि लचक हुन ओलीमाथि दबाब बढेपछि उनी आयोजक कमिटी भंग गरेर केन्द्रीय कमिटी पुरानै अवस्थामा फर्काउन तयार भएका हुन् ।

आयोजक कमिटी भंग गरेर केन्द्रीय समितिको बैठक बोलाउने तयारी भएपछि अब नेपाल समूह के गर्ला ? अहिले सबैको चासो त्यतै छ । आयोजक कमिटीमा नेपाल पक्ष भने सहभागी छैन ।

नेपाल समूहका नेताहरू कृष्णलाल महर्जनको निवासमा अबको रणनीति के बनाउने भन्नेमा छलफलमा जुटेका हुन् । यो छलफलले ओली पक्षको महाधिवशेन आयोजक कमिटीको बैठकको निर्णय हेर्ने र थप रणनीति बनाउने तयारी गरेको सहभागी एक नेताले बताए ।

नेता नेपाल समूहको छलफलमा ओलीले चालेको पछिल्लो कदम र आफूहरूको आगामी रणनीतिमा केन्द्रीत रहेर छलफल भइरहेको छ ।