काठमाडौं । सर्वोच्च अदालतले गत फागुन २३ गते नेकपा एमाले र माओवादीलाई २ जेठ २०७५ को अवस्थामा फर्काएपछि एमाले केन्द्रिय कमिटीको बैठक पहिलो पटक शुक्रबार बस्दैछ । शुक्रबार प्रधानमन्त्री निवास बालुवाटारमा बिहान ११ बजेका लागि केन्द्रिय कमिटीको बैठक बोलाइएको छ ।

भोली बस्ने केन्द्रिय कमिटी बैठकको लागि एमालेले पार्टीका वरिष्ठ नेता मावध कुमार नेपाल पक्षका नेतालाईसमेत केन्द्रिय कमिटी बैठकको निम्तो दिइसकेका छ ।

एमाले केन्द्रिय पार्टी कार्यालयका सचिव शेर बहादुर तामाङका अनुसार एस्एमएस र मेलबाट पत्र पठाइ सकेको छ । फेरी एक पटक एस्एमएस पठाउने तामाङले बताए । केन्द्रिय कमिटी बैठकको लागि पार्टीका वरिष्ठ नेता झलनाथ खनाल र नेपालसहितका नेतालाई निम्तो दिइएको छ ।

यसअघि एमाले अध्यक्ष केपी शर्मा ओलीले एमाले ९औं महाधिवेशनबाट निर्वाचित कमिटीलाई भंग गरेर १०औं राष्ट्रिय महाधिवेशन आयोजक कमिटी बनाएका थिए । त्यसपछि एमालेमा विवाद हुँदै आएको थियो । पार्टीको विवाद मिलाउन र सर्वोच्च अदालतले उक्त कमिटीलाई मान्यता नदिएपछि एमालेले १०औं राष्ट्रिय महाधिवेशन आयोजक कमिटीलाई केन्द्रिय कमिटीमा रुपान्तरण गरेको हो ।

तर, अवैध मानिएको कमिटीले माओवादी खेमाका चार र ३ जेठमा स्थायी कमिटीमा थपिएका केही नेतालाई स्थायी कमिटीमा थपिएको छ । जसले गर्दा पार्टीका वरिष्ठ नेता माधव कुमार नेपाल पक्ष ससंकित भएको छ । नेपाल पक्षले २ जेठ २०७५ को अवस्थामा बैठक बसेर मात्रै अरुलाई कहाँ थप्न सकिन्छ थप्नु पर्ने माग राख्दै आएको छ ।

एमालेले पार्टीको केन्द्रिय कमिटी बैठक बोलाएपछि दुवै पक्षका नेताहरु छलफलमा जुटेका छन् । यस्तै नेपाल पक्षको स्थायी कमिटी बैठक बसी रहेको छ । नेपाल पक्षले स्थायी कमिटीको बैठकले केन्द्रिय कमिटीको बैठकमा जाने वा नजाने भन्ने विषयमा निर्णय गर्ने छ ।