काठमाडौं । नेकपा एमालेका उपाध्यक्ष वामदेव गौतमले एमालेका सांसदले कांग्रेस सभापति शेर बहादुर देउवालाई प्रधानमन्त्री बनाउन हस्ताक्षर गर्नु अनैतिक भएको बताएका छन् । पार्टीको केन्द्रीय कमिटीको बैठकलाई सम्बोधन गर्दै उनले आफू पार्टीबाट राजीनामा दिएर मात्रै देउवाका पक्षमा हस्ताक्षर गर्ने बताएका थिए ।

उनले व्यक्तिगत रूपमा आफू पार्टी अध्यक्ष केपी ओलीको पक्षमा रहेको बताए । उनले पार्टी एकताको प्रयासलाई सार्थक निष्कर्षमा पुर्याउन ओलीसँग आग्रह गरे । मुख्य नेतालाई सम्मानजनक व्यवहार गरिएन भने तलको पंक्ति भड्किने भन्दै उनले माधव नेपालसहितको एकता हुनुपर्ने बताए ।

उनले भने, ‘मैले मित्रघात आजसम्म गरेको छैन, जे भनिरहेको छु यो हाम्रो हितमा छ, व्यक्तिगत रुपमा म ओलीकै पक्षमा छु । तर, मुख्य नेतालाई अपमान गरेर एकता हुँदैन, हतार गर्नुहुन्न, माधव नेपालसहितको एकता हुनुपर्छ ।’

गौतमले महाधिवेशनबाट निर्वाचन हुँदा केन्द्रीय कमिटीमा माधव नेपालका ९ जना मात्र सदस्य कम रहेको स्मरण गराउँदै पार्टी आधा आधा विभाजित अवस्थामा रहेको बताए ।