काठमाडौं । नेकपा (एमाले) पार्टी एकता जोगाउन गठित कार्यदलको बैठक अहिले बस्दै छ । पार्टी अध्यक्ष केपी शर्मा ओली पक्षका कार्यदल संयोजक सुवास नेम्वाङले कार्यदल ब्यूँतिएसँगै पहिलो बैठक अहिले नै बस्न लागेको जानकारी गराए ।

उनले पार्टी एकता लागि प्रयास जारी राख्न कार्यदल ब्यूँतिएको बताए । कार्यदलमा ओली पक्षबाट संयोजक नेम्वाङ र सदस्य विष्णुप्रसाद पौडेल, प्रदीप ज्ञवाली, शंकर पोखरेल र विष्णु रिमाल रहेका छन् ।

यस्तै वरिष्ठ नेता माधवकुमार नेपाल पक्षबाट संयोजक भीम रावल र सदस्यमा सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त छन् । गत २ जेठमा गठित कार्यदलको बैठक ६ जेठपछि बसेको थिएन ।

अध्यक्ष ओलीले नेपाल पक्षका कार्यदलका संयोजक रावललाई १२ जेठमा पार्टीबाट निष्कासन गर्ने निर्णय गरेपछि कार्यदल निष्क्रिय भएको थियो । त्यसपछि आज बैठक बस्दै छ । पार्टी मिलाउन अन्तिम प्रयास हुँदै छ । कार्यदलबाट अनुमोदन गरेर दुवै पक्ष पार्टी एकताको लागि संयुक्त वक्तव्य निकाल्ने सहमति भएको छ ।