काठमाडौं । मकवानपुरको हेटौँडाबाट अवैध ५७ किलो ९ सय ग्राम लागूऔषध गाँजासहित २ जना पक्राउ परेका छन् ।

इलाका प्रहरी कार्यालय रातोमाटेबाट खटिएको टोलीले हेटौंडास्थित पिपल चौतरा पूर्व पश्चिम सडक खण्ड स्थित चितवनबाट बारातर्फ जाँदै गरेको ना. ४ च १५०१५ नम्वरको बोलेरो पिकअप गाडीलाई रोकी चेकजाँच गर्ने क्रममा बुधबार साँझ उक्त गाँजा फेला पारेको हो ।

प्रहरीले गाडीका चालक चितवन जिल्लाको राप्ती नगरपालिका वडा नम्वर ६ बस्ने वर्ष २६ को संजय चौधरी र सोही गाडीमा सवार चितवनकै वर्ष ४८ को लालजी शाहलाई पक्राउ गरेको हो ।

सो गाडीको पछाडिको भागमा फल्स बटम बनाई लुकाएर ल्याएको गाँजा बरामद गरिएको जिल्ला प्रहरी कार्यालय मकवानपुरले जनाएको छ ।