काठमाडौं । प्रदेश सभाबाट बजेट पारित गराउन नसकेपछि लुम्बिनी प्रदेश सरकारले प्देश सभाको अधिवेशन नै अन्त्य गरेको छ ।

प्रदेश सरकारको सिफारिसमा प्रदेश प्रमुख धर्मनाथ यादवले बिहीबार रातीबाट लागू हुने गरी अधिवेशन अन्त्य गरेका हुन् ।

आगामी आर्थिक वर्ष २०७८/०७९ का लागि सरकारले ल्याएको बजेटमाथि प्रदेश सभा सदस्यले उठाएको प्रश्नको विभागीइ मन्त्रीले बिहीबार बसेको प्रदेश सभा बैठकमा जवाफ दिएका थिए । मन्त्रीको जवाफप्रति असन्तुष्टि जनाउँदै विपक्षी गठवन्धनले बजेट पास हुन नदिने अडान लिएका थिए ।

विपक्षमा बहुमत हुने देखिएपछि मुख्यमन्त्री शंकर पोखरेल सहितका सत्तारुढ दलका सांसद प्रदेश सभाको बैठक हलबाट बाहिरिएका थिए ।

प्देश सभाबाट बजेट पास हुन नसकेपछि अब बजेट ल्याउ प्रदेश सरकारले अध्यादेशको बाटो रोज्ने भएको छ । संवैधानिक व्यवस्था अनुसार गत असार १ गते प्रदेश सरकारले प्रदेश सभामा बजेट पेश गरेको थियो ।

विपक्षी गठवन्धनको असहयोगका कारण लुम्बिनी प्रदेश सरकारले बजेट पारित गराउन नसकेको हो ।

बजेट पास गराउन नसकेपछि कर्णाली प्रदेश सरकारले पनि प्रदेश सभाको अधिवेशन अन्त्य गराएर अध्यादेशबाटै बजेट ल्याउने बाटो रोजेको थियो । कर्णालीबाट सुरु भएको अभ्यास अन्य प्रदेशले पनि अनुसरण गर्न थालेका हुन् ।

प्रदेश सभाको अधिवेशन अन्त्य गराएर अध्यादेशबाट बजेट ल्याएर प्रदेशहरुले गलत नजिर स्थापित गराएको कानूनका जानकारहरुले टिप्पणी गरेका छन् ।