काठमाडौं । नेकपा एमालका शिर्ष नेताहरु आन्तरिक छलफलमा जुटेका छन् । सरकारले राजनीति दल विभाजनसम्बन्धि अध्यादेश ल्याउने तयारी गरेपछि एमाले शिर्ष नेताहरु आन्तरिक छलफल गर्न थालेका हुन् ।

सोमबार बसेको मन्त्रिपरिषद बैठकले संसद अधिवेशन अन्त्य गर्न राष्ट्रपतिसमक्ष सिफारिस गर्ने निर्णय गरेको थियो । सरकारले संसद अधिवेशनको अन्त्य गरेर राजनीतिक दल विभाजनसम्बन्धी अध्यादेश ल्याउन लागेको बताइउको छ । संसद अधिवेशन आज राति १२ बजेपछि अन्त्य हुँदैछ ।

सरकारले एमाले वरिष्ठ नेता माधव कुमार नेपाल पक्षलाई सहज हुने गरी दल विभाजनसम्बन्धी अध्यादेश ल्याउन थालेपछि पार्टी अध्यक्ष केपी शर्मा ओलीले आन्तरिक छलफल गर्न पार्टीका पदाधिकारी र स्थायी कमिटी सदस्यलाई बालकोटा बोलाइएको बताइएको छ । एमाले पार्टी एकता कायम राख्न १० बुँदे सहमति भएपनि नेता नेपालले समान अधिकारसहितको अध्यक्ष माग गरेका थिए ।

तर, ओली पक्षले नेता नेपाललाई समान अधिकारको अध्यक्ष बनाउन नसकिने जनाएपछि पार्टी एकता कायम राख्नेमा दुबै पक्ष सहमत हुन सकेकाे थिएन । ओली शिर्ष नेतासँग अबको रणनीतिका बारेमा छलफल गरिरहेका छन् । अझै पनि पार्टी एकता कायम राख्न दुबै पक्षबाट प्रयास जारी रहेको बताइएको छ ।