चितवन । साहित्यकार सुमन घिमिरेका दुई वटा काव्य एकैपटक लोकार्पण गरिएका छन् ।

पर्यटन व्यवसायीसमेत रहेका घिमिरेका नेपाली भाषाको कविता संग्रह ‘सुनको टप’ र अङ्ग्रेजी भाषाको कविता संग्रह ‘साइक्लोन अफ फायर’ लोकार्पण गरिएको हो ।

प्रकाशक गोर्खा पब्लिकेसन्स प्रालिको आयोजना र कविडाँडा साहित्य समाज चितवनको संयोजनमा भएको कार्यक्रममा साहित्यकार प्रतिक ढकालले दुवै कृति एकसाथ लोकार्पण गरे । सो अवसरमा कवि भुपिन र चेतराज रेग्मीले कविताको समीक्षा गरेका थिए । कविताको समीक्षा गर्दै कविडाँडा साहित्य समाज चितवनका अध्यक्ष साहित्यकार एलबी क्षेत्रीले मुलुकको वास्तविकता कवितामार्फत चित्रण भएको बताए ।

कवि घिमिरेको विसं २०६८ मा पहिलो कविता संग्रह ‘मेरो बैंसको क्यालेण्डर’ सार्वजनिक भएको थियो । यी १० वर्षको बीचमा लेखिएका कवितालाई यस संग्रहमा स्थान दिएको कवि घिमिरेले बताए । घिमिरे क्षेत्रीय होटल संघ सौराहाका पूर्वअध्यक्ष समेत हुन् ।