काठमाडौं । प्रस्तावित एकिकृत समाजवादीका वरिष्ठ नेता झलनाथ खनालले दिल्लीबाट पार्टीको बैठकलाई सम्बोधन गरेका छन् । उनले मंगलबार चन्द्रागिरी रिसोर्टमा बसेको बैठकलाई भर्चुअल माध्येमबाट सम्बोधन गर्दै आफू एकिकृत समाजवादी पार्टीको वरिष्ठ नेता भएको बताएका छन् ।

उनले आगामी सोमबार आफू नेपाल फर्किने बताए । एमाले विभाजन क्रान्तिकारी व्रिद्रोह भएको भन्दै उनले स्थायी कमिटीका सदस्यहरूले मध्यपन्थी अवसरवादको बाटो लिएर केपी ओलीलाई साथ दिएको बताए ।

उनले भने, ‘कमरेडहरु, अब जबजको युग सिद्धियो, त्यसलाई कसैले अनुसरण गर्न सक्दैन । अब हाम्रो प्रष्ट कार्यक्रम समाजवादमा रुपान्तरणको कार्यक्रम हो । हामीले युग अनुसारको बोली बोल्नुपर्छ । युग अनुसारको कार्यक्रम बनाउनुपर्छ । नेकपा एकीकृत समाजवादीको बारेमा बुझाउन मुखपत्र छाप्ने पर्छ । केपी ओलीको खण्डनमा सिंगो पंक्ति उत्रिनु पर्छ ।’

उनले मदन भण्डारीबाट प्रतिपादित जनताको बहुदलीय जनवादको युग सकिएको बताए ।