काठमाडौँ । सत्ता साझेदारी पाँच दलका नेताहरूले चाँडै मन्त्रिपरिषद विस्तार गर्ने सहमति गरेका छन् । प्रधानमन्त्री निवास बालुवाटारमा सोमबार बसेको गठबन्धन दलको बैठकमा नेताहरूले मन्त्रिपरिषद् विस्तार रोक्न नहुने बताएका हुन् ।

यद्यपि, मन्त्रालय भागबण्डाबारे छलफल नभएको बालुवाटार स्रोतले जनाएको छ । मन्त्रालय भागबण्डाबारे पुनः गठबन्धन दलका शीर्ष नेताहरूबीच छलफल हुने भएको छ ।

बैठकमा प्रधानमन्त्री तथा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधव कुमार नेपाल, जनता समाजवादी पार्टीका संघीय परिषद्का अध्यक्ष डा. बाबुराम भट्टराई र अध्यक्ष उपेन्द्र यादव बैठकमा सहभागी भएको बालुवाटार स्रोतले जनाएको छ ।